ԱՄՆ պետդեպարտամենտը Բաքվից պահանջել է անհապաղ ազատ արձակել Անար Մամեդլիին
Ադրբեջանական Turan լրատվական գործակալության փոխանցմամբ՝ ԱՄՆ պետդեպարտամենտը հանդես է եկել հայտարարությամբ՝ կապված Ադրբեջանում հայտնի իրավապաշտպան Անար Մամեդլիին կալանքի տակ առնելու հետ: Պետդեպարտամենտի հայտարարության մեջ նշված է.
«Մենք խոր մտահոգություն ենք հայտնում՝ կապված Ընտրությունների մոնիթորինգային ու ժողովրդավարության ուսուցման կենտրոնի նախագահ Անար Մամեդլիին կալանավորելու կապակցությամբ: Մենք կոչ ենք անում իրավական գործընթացի ընթացքում անհապաղ ազատ արձակել նրան:
Մենք բարձրացրել և բարձրացնելու ենք այդ հարցը Ադրբեջանի կառավարության բարձաստիճան պաշտոնյաների առջև: Մենք շարունակում ենք ակնդետ հետևել կենտրոնի գործունեության հետաքննմանը:
Մենք նաև ուշադիր հետևում ենք Ադրբեջանի խորհրդարանի կողմից օրենսդրությունում կատարվող սահմանափակիչ ուղղումներին, որոնք ուղղված են հասարակական կազմակերպությունների դեմ: Մենք շարունակում ենք Ադրբեջանի կառավարությանը կոչ անել հարգել ազատ արտահայտվելն ու ազատ հանրահավաքներ անելը»:
