Միլեր. Հայաստան ներկրվող գազի գինը փոխկապակցած կլինի Ռուսաստանի ներքին գների հետ
Հայաստան մատակարարվող գազի այդ գինը փոխկապակցած է լինելու Ռուսաստանում գործող ներքին գների հետ: Այս մասին այսօր հայտարարել է «Գազպրոմ» ԲԲԸ վարչության նախագահ Ալեքսեյ Միլերը:
Այսօր ամբողջական ծավալով շահագործման է հանձնվել Հրազդանի ՋԷԿ–ի 5-րդ էներգաբլոկը, որը 2012 թվականի հունվարից գտնվում էր փորձարարական-արդյունաբերական շահագործման փուլում:
Թողարկման մեկնարկի արարողությանը մասնակցել են «Գազպրոմ» ԲԲԸ վարչության նախագահ Ալեքսեյ Միլերը եւ «ՀայՌուսգազարդ» ՓԲԸ վարչության նախագահ-գլխավոր տնօրեն Վարդան Հարությունյանը: Հանդիսավոր արարողությանը Գյումրիի պետական դրամատիկական թատրոնից հեռուստակամրջի միջոցով ուղիղ միացմամբ հետեւել են ՌԴ եւ ՀՀ նախագահներ Վլադիմիր Պուտինը եւ Սերժ Սարգսյանը:
«Այսօր ստորագրվելու է համապատասխան փաստաթուղթ, որի համաձայն «Գազպրոմ»-ը ձեռք է բերում «ՀայՌուսգազարդ»-ի բաժնետոմսերի 20 տոկոսը եւ դառնում է ընկերության լիակատար բաժնետեր: Այսօր նաեւ ստորագրվելու է Հայաստանի համար շատ կարեւոր պայմանագիր գազի մատակարարման վերաբերյալ: Սահմանվելու է նոր գին, եւ Հայաստան մատակարարվող գազի այդ գինը փոխկապակցած է լինելու Ռուսաստանում գործող ներքին գների հետ: Անկասկած, սա չափազանց հզոր ազդակ է Հայաստանի սոցիալ-տնտեսական զարգացման համար»,-հայտարարել է «Գազպրոմ» ԲԲԸ վարչության նախագահը:
