Մոսկվայում ուղղաթիռի վթարվելու վնասը կարող է հասնել 25 միլիոն դոլարի
Ռուսական Интерфакс լրատվական գործակալության փոխանցմամբ՝ այսօր «Կա-52 Ալիգատոր» տիպի ուղղաթիռ է կործանվել Մոսկվայի հարավ-արևելյան հատվածում: Այն գործնականում այրվել է ամբողջությամբ և ենթակա չէ վերականգնման:
Հաշվի առնելով ուղղաթիռում փորձնական սարքավորման առկայությունը՝ վթարի պատճառած վնասը կարող է կազմել մոտ 800 միլիոն ռուբլի (25 միլիոն դոլար): Այս մասին գործակալությանը հայտնել է իրավիճակին իրազեկ, անանուն աղբյուրը:
Ռուսաստանի առողջապահության նախարարի խորհրդական Իգոր Լանսկու խոսքերով՝ ուղղաթիռի երկու օդաչուների առողջական վիճակը գնահատվում է որպես միջին ծանրության, նրանցից մեկը վնասել է կրծքավանդակն ու ազդրը, իսկ մյուսը՝ ողնաշարը:
Գործակալության աղբյուրը հերքել է, թե նրանք կատապուլտի են ենթարկվել: Աղբյուրի խոսքերով՝ օդաչուներն ինքնաթիռից դուրս են եկել նրա անկումից հետո միայն: Որպես վթարի պատճառ է նշվում տեխնիկական անսարքությունը: Ուղղաթիռն ընկել է բնակելի տներից ընդամենը 100 մետր հեռավորության վրա:
