Բաքվում տեղի է ունեցել Ադրբեջանի նորընտիր նախագահ Իլհամ Ալիևի երդմնակալությունը
Ռուսական ИТАР-ТАСС լրատվական գործակալության փոխանցմամբ` այսօր Բաքվում տեղի է ունեցել Ադրբեջանի նորընտիր նախագահ Իլհամ Ալիևի երդմնակալությունը: Առաջին անգամ այդ արարողությունն անցկացվել է խորհրդարանի շենքում:
Ավելի վաղ պետության նորընտիր ղեկավարները երդում են տվել երկրի գլխավոր համերգային սրահում` Հեյդար Ալիևի անվան պալատում: Արարողության ժամանակ Ալիևը տվել է երկու երդում: Դրանցից մեկն առնչվել է Ադրբեջանի Սահմանադրությանը, Ալիևը խոստացել է պահպանել այն, պաշտպանել պետության անկախությունը և արժանավայել ծառայել ժողովրդին:
Երկրորդ երդումն առնչվում է Ղուրանին, Ալիևը երդվել է հավատարիմ գտնվել Ադրբեջանի ժողովրդի ազգային-հոգևոր արժեքներին ու ավանդույթներին: Դրանից հետո Ալիևը ծնկի է իջել և համբուրել է պետական դրոշը, ինչից հետո ելույթ է ունեցել:
Այսօր առավոտյան Ադրբեջանի ՍԴ-ը հաստատել էր հոկտեմբերի 9-ին երկրում անցկացված նախագահական ընտրությունների արդյունքները, որոնց համաձայն, Իլհամ Ալիևը հավաքել է քվեների 84.5 տոկոսը: Այս հնգամյա ժամկետը նրա համար կհանդիսանա թվով երրորդը:
