Թուրքիայի Ազգային հետախուզական կազմակերպությունն ունի ընդդիմադիր քաղաքական գործիչների ու գործարարների «սև ցուցակ»
![](https://168.am/wp-content/uploads/2013/10/mit-mhp-yi-de-fislemis-4732446_6364_o.jpg)
Թուրքական Taraf թերթի փոխանցմամբ՝ Թուրքիայի Ազգային հետախուզական կազմակերպությունը (MIT) խոստովանել է, որ ունի ընդդիմադիր քաղաքական գործիչների ու գործարարների «սև ցուցակ», ինչի նպատակը բաց մրցույթներին նրանց մասնակցելուն խոչընդոտելն է:
MIT-ի ուշադրության կենտրոնում են գտնվում ընդդիմադիր «Ժողովրդա-հանրապետական» (ԺՀԿ) ու «Ազգայնական շարժում» (ԱՇԿ) կուսակցությունների պատգամավորները, ինչպես նաև այդ կուսակցությունների հետ կապված գործարարները:
Նշվում է, որ «սև ցուցակի» ստեղծումը միտված է թուրքական պետության անվտանգության ապահովմանը, նրան ներքին ու արտաքին օգուտներ պատճառելուն: Թերթն այս մասին առաջին անգամ ահազանգել է դեռևս հունիսի 13-14-ին, ինչից հետո MIT-ը պահանջել էր արգելք դնել տվյալ թեմայով հրապարակումների վրա:
Անկարայի Հանրապետական դատախազությանը հղած MIT-ի նամակում ընդգծվել է, որ թերթի հրապարակած փաստաթղթերը պարունակում են գաղտնի տեղեկատվություն և պետք է մատչելի չլինեն հանրության համար: MIT-ը պահանջել էր 10 տարի ազատազրկման դատապարտել Taraf թերթի լրագրող Մեհմեթ Բարանսուին այդ հրապարակման համար:
Թերթի պնդմամբ՝ MIT-ը քաղաքական ու կրոնական հայացքների, անձնական կյանքի վերաբերյակ տեղեկատվություն է հավաքել ընդդիմադիր 6 պատգամավորի և քաղաքական գործչի մասին: