Երևանը բարձր է գնահատում Ռուսաստանի հետ հարաբերությունները. փորձագետ
Հայաստանի նախագահ Սերժ Սարգսյանի` Մաքսային միությանը միանալու որոշման վերաբերյալ հայտարարությունը նշանակում է, որ Երեւանը նախկինի պես բարձր է գնահատում Մոսկվայի հետ հարաբերությունները եւ չի ցանկանում հօգուտ Եվրոպայի դրանք ռիսկի ենթարկել, հայտարարել է МГИМО-ի Կովկասի եւ տարծաշրջանային անվտանգության կենտրոնի աշխատակից, Միջազգային հարցերով ռուսաստանյան խորհրդի փորձագետ Վադիմ Մուխանովը, տեղեկացնում է РИА Новости-ն:
Նա Սարգսյանի այցը Մոսկվա ուղենիշային է համարել: «Վերջին ամիսներին որոշակի խուճապ էր հայտնվել երկկողմ հարաբերություններում, քանի որ Հայաստանը գտնվում էր պատմական քառուղու վրա: Մի կողմից` Վիլնյուսի գագաթնաժողովը եւ Եվրոպայի հետ համագործակցության խորացումը, մյուս կողմից` Հայաստանի արտաքին քաղաքականության գլխավոր վեկտորի ռուսական ուղղվածությունը»,-նշել է փորձագետը:
«Հասկանալի է, որ Հայաստանի համար առանցքայինը ոչ թե տնտեսական, այլ անվտանգության հարցն է: Ներկայումս միայն Մոսկվան է իրական երաշխիքներ տալիս, ինչի վկայությունը Գյումրիում ռուսական ռազմաբազայի առկայությունն է»,-հայտարարել է փորձագետը:
Նա նշել է, որ Հայաստանը նաեւ տնտեսական առումով է Ռուսաստանի հետ կապված: «Ռուսաստանյան ներդրումները Հայաստանում մեծ ծավալ են կազմում: Ասոցացված համաձայնագիրը մարդկանց կյանքի համար որոշակի թեթեւացում է նշանակում, սակայն այն երկարժամկետ եվրոպական ներդրումների երաշխիք չի տալիս»,-վստահություն է հայտնել նա:
Այսպիսով, ըստ փորձագետի, Սերժ Սարգսյանի հայտարարությունը նշանակում է, որ Հայաստանի համար «նախկինի պես թանկ են երկկողմ հարաբերությունները, եւ նա չի ցանկանում դրանք ռիսկի ենթարկել` հանուն Եվրոպայի կողմից ինչ-ինչ պոտենցիալ շահերի»:
«Դեպի Եվրոպա կողմնորոշումը հասկանալի է, սակայն իրական դիվիդենտներ առայժմ բերում է միայն Մոսկվայի հետ սերտ համագործակցությունը: Սարգսյանը պրագմատիկ ընտրություն է կատարել»,-եզրափակել է փորձագետը:
