Ջոն Քերին և Սերգեյ Լավրովը քննարկել են Սիրիայի հարցը
Ռուսական ИТАР-ТАСС լրատվական գործակալության փոխանցմամբ՝ Ռուսաստանի արտգործնախարար Սերգեյ Լավրովն ու ԱՄՆ պետքարտուղար Ջոն Քերին այսօր հեռախոսազրույց են ունեցել՝ կապված Սիրիայում տիրող իրավիճակի հետ: Այս մասին հայտնել է Ռուսաստանի ԱԳՆ-ը:
Վերջինիս հաղորդմամբ՝ հեռախոսազրույցի ժամանակ կողմերն ընդհանուր շահագրգռվածություն են հայտնել ներկայումս Սիրիայում գտնվող ՄԱԿ-ի փորձագետների կողմից Դամասկոսի արվարձանում քիմիական զենքի կիրառման մասին տեղեկատվության օբյեկտիվ հետաքննություն անցկացնելում:
Լավրովն ընդգծել է, որ այդ տեղեկատվության ստացումից անմիջապես անց ռուսական կողմը Սիրիայի կառավարությանը կոչ է արել համագործակցել ՄԱԿ-ի փորձագետների հետ՝ հավելելով, որ գնդակն այժմ սիրիական ընդդիմության կիսադաշտում է, որը պետք է ապահովի ՄԱԿ-ի առաքելության անվտանգ ժամանումը ենթադրյալ միջադեպի վայր:
