Լավատեսից լավատես

Աշխարհը հույս ունի, որ զարգացող տնտեսությունները կապահովեն տնտեսական աճը, սակայն բոլոր զարգացող երկրներում անկումային շրջան է նկատվում։ Լավատեսության հիմքեր չկան, իսկ համաշխարհային տնտեսության առողջացման համար վճռական քայլեր են պետք։ Այս մասին Projrct Syndicate-ի կայքում գրել է Փրինսթոնի պրոֆեսոր Աշոկա Մոդին։

Արժույթի միջազգային հիմնադրամը 2010 թվականի ապրիլին լավատեսական գնահատականներ են տվել համաշխարհային տնտեսությանը՝ առաջիկայի համար կանխատեսելով տարեկան 4.5% տնտեսական աճ։ Սակայն այդ ժամանակից ի վեր ԱՄՀ-ն մշտապես վերնայում է իր կանխատեսումները և արդեն գրեթե կրկնակի նվազեցրել է։
Ըստ Մոդիի, այս տարվա համաշխարհային տնտեսության կանխատեսվող 3.3% աճը (որը վերջին զեկույցում վերանայվեց նվազեցման ուղղությամբ) իրականություն չի դառնա։
Մոդին նշում է, որ ԱՄՀ-ի կայուն լավատեսությունը խոսում է լուրջ սխալների մասին, երբ խոսքը վերաբերում է համաշխարհային տնտեսության խնդիրների վերլուծությանը։ Տնտեսագետը ավելացնում է, որ ԱՄՀ կանխատեսումները զգալիորեն թերագնահատել են եվրոյի գոտու ճգնաժամը և դրա ազդեցությունը աշխարհի մյուս երկրների վրա։

Այս ամենի ֆոնին՝ բավական հետաքրքիր է դիտվում Հայաստանի պարագան։ Եթե համաշխարհային տնտեսության հարցում չեն իրականանում ԱՄՀ լավատատեսական կանխատեսումները (տնտեսությունն ավելի դանդաղ է աճում), ապա Հայաստանի պարագայում ճիշտ հակառակն է՝ ԱՄՀ-ն ավելի վատատես է, քան ՀՀ կառավարությունը, և աճի ցուցանիշը ԱՄՀ գնահատականից ավելի բարձր է լինում։
Օրինակ՝ 2012 թվականի համար, ըստ ԱՄՀ զեկույցի, Հայաստանում ՀՆԱ-ի իրական աճը 2012թ. կանխատեսվում էր 3.9%, սակայն արձանավեց 7.2% աճ։ Իսկ այս տարվա համար կառավարությունը նախատեսում է 6.2% աճ, իսկ ԱՄՀ-ն՝ 4%-ի սահմաններում։
Տրամաբանությունը հուշում է, որ ԱՄՀ-ն այս տարի էլ կսխալվի (եթե ֆորսմաժորային իրավիճակներ չլինեն)։ Որովհետև տնտեսական աճի լուրջ ռեսուրսներ թեպետ չունենք, փոխարենը ունենք գերպրոֆեսիոնալ վիճակագրություն։