«Ամուսնացած եմ նախագահի հետ». Ռիտա Սարգսյանը՝ ամուսնու և ընտանիքի մասին (տեսանյութ, լուսանկարներ)
Ռուսաստանյան հայտնի՝ Россия 24 / Вести հեռուստաալիքը փետրվարի 7-ին և 8-ին ներկայացրել է իր պատրաստած՝ 2 մասից բաղկացած «Ամուսնացած եմ նախագահի հետ» («Замужем за президентом») վերնագրով ֆիլմը, որում ՀՀ Առաջին տիկին Ռիտա Սարգսյանը պատմել է գործող նախագահ, ՀՀ նախագահի թեկնածու Սերժ Սարգսյանի աշխատանքների մասին:
ՀՀ Առաջին տիկնոջ խոսքով՝ նախագահի գրաֆիկը շատ ծանրաբեռնված է՝ տասնյակ հանդիպումներ, հարյուրավոր ժամեր ինքնաթիռներում, հազարավոր որոշումներ: Հասկանալով այս ամենը՝ Ռիտա Սարգսյանն ամեն ինչ անում է ամուսնու համար մաքսիմալ հարմարավետություն ապահովելու համար: Առաջին տիկինը պատմություններ է ներկայացնում, որոնք հեռուստադիտողը պաշտոնական լրահոսի «կադրերում» չի տեսնում:
Ֆիլմում Սերժ Սարգսյանի մասին են պատմում նրա մանկության, պատանեկության ընկերները, նրանց մտերիմները, գործընկերները, հարազատները: Ռիտա Սարգսյանը պատմում է, թե ինչպես է Սերժ Սարգսյանը գրավել նրա սիրտը՝ 25 մեխակներ նվիրելով, ինչպես են ամուսնացել ընտանիք կազմել:
Հեռուստաընկերությունը նկարահանումներ է անցկացրել Լեռնային Ղարաբաղում՝ Ս. Սարգսյանի հայրական տանը, Նախագահական ամառանոցում, և այլն:
