ՀՀԿ-ական պատգամավորը չի հասկանում թեկնածու ներդնելու իմաստը
«Բոյկոտելը քաղաքական կատեգորիա է, բայց դրա համար պետք են նաև որոշակի չգրված կանոններ: Բոյկոտելու պարագայում պետք է հայտարարես բոյկոտելու մասին և փորձես չմասնակցել ընտրական պրոցեսներին: Մինչ օրս որևէ քաղաքական ուժ կամ քաղաքական գործիչ, ովքեր չեն առաջադրվել կամ չեն մասնակցել, նման հայտարարություն չեն արել»,-այսօր լրագրողների հետ հանդիպման ժամանակ հայտարարեց ԱԺ ՀՀԿ խմբակցության քարտուղար Հովհաննես Սահակյանը:
Անդրադառնալով նախագահի առաջադրված թեկնածուների կողմից հնչեցրած կոչերին՝ բոյկոտել ընտրությունները, Հովհաննես Սահակյանը նշեց, որ դա ընդամենն իրենց վրա ուշադրություն սևեռելու և արհեստական աժիոտաժ ստեղծելու միջոց էր:
ԱԺ ՀՀԿ խմբակցության քարտուղարի կարծիքով, ընտրագրավի շուրջ ստեղծված աժիոտաժը ևս արհեստական էր: Նա նշեց, որ ընտրագրավը ընդունված պրակտիկա է Կենտրոնական Եվրոպայում և այն որևէ կերպ չի հակասում ՀՀ Սահմանադրությանը և օրենսդրությանը: Նրա կարծիքով, Հայաստանում մարդկանց ամբիցիաները չափազանց մեծ են, և ընտրագրավի մեխանիզմը թույլ է տալիս խուսափել արհեստական թեկնածուներից:
«Եթե մոտ 300 հոգի գրանցվի ընտրական այս գործընթացին մասնակցելու համար, քվեաթերթիկի մեջ մինչև գտնես քո ցանկացած թեկնաուծին, դա լուրջ տեխնիկական խնդիր է: Առավել ևս, եթե օրենքով սահմանված կարգով, ապահովես վստահված անձանց սահմանված տեղերը, ես կարծում եմ, Մարզահամերգային համալիրի պես տեղ պետք կլիներ յուրաքանչյուր ընտրատեղամասի համար»,-նշեց բանախոսը:
Հ. Սահակյանը, թեև դեպք չի հիշում, որ համապետական ընտրությունների ժամանակ պարտվող թեկնածուն շնորհավորի հաղթողին, սակայն նրա կարծիքով, եթե նման բան տեղի ունենա, նոր մշակույթ կներմուծի:
«Եթե մենք կարողանանք մեր մեջ ուժ գտնել և հաղթահարել այն բարդույթը, որը մշտապես ունենում են պարտվող թեկնածուները, և եթե նորմալ ժողովրդավարական ընտրությունների արդյունքում նաև շնորհավորեն հաղթող թեկնածուին, դա ևս մեկ քայլ կլինի ընտրական պրոցեսի, ընտրական մշակույթի մեջ»,-հայտարարեց Հովհաննես Սահակյանը:
Նրա համոզմամբ, վերջին խորհրդարանական ընտրությունները մեկ այլ առաջ էին և ևս մեկ քայլ էլ արվելու է այս նախագահական ընտրությունների ժամանակ:
Խոսելով թեկնածուների՝ իշխանությունների կողմից ներդրված լինելու մասին՝ Հովհաննես Սահակյանը նշեց, որ իշխանություններին դա պետք չէ: «Առնվազն չեմ կարողանում պատկերացնել, թե ինչի համար պետք է ներդնենք: Օրինակ, ում ենք ներդրել ՝ էպոսագետի՞ն, Հրանտ Բագրատյանի՞ն, Րաֆֆի Հովհաննիսյանի՞ն, Պարույր Հայրիկյանի՞ն: Նմանատիպ խնդիր չկա: Ես կցանկանայի, որ գոնե այս ընտրություններին գնայինք հավատով: Այս ընտրությունները լինելու են մեր հավատի, հույսի վերականգման ընտրությունները, և ընտրական պրոցեսները և հետընտրական պրոցեսները տանելու են դրան»,-հայտարարեց ՀՀԿ-ական պատգամավորը:
