«Եթե երշիկների մեջ օգտագործված հավելանյութերը չեն գերազանցում թույլատրելիի չափը, մարդկանց ոչ մի վտանգ չի սպառնում». մասնագետ
Օրերս ՏՄՊՊՀ-ն (Տնտեսական մրցակցության պաշտպանության պետական հանձնաժողով) հրապարակել էր երշիկ արտադրող օրինախախտ ընկերությունների ցանկը:
Վերջիններիս մեծ մասն, ըստ ՏՄՊՊՀ-ի, վաճառքի հանված երշիկեղենի վրա նշում է, որ պատրաստման ընթացքում օգտագործվել է տավարի և խոզի բարձրորակ միս: Մինչդեռ հանձնաժողովը բացահայտել է, որ արտադրական պրոցեսում՝ քաշի ավելացման, ախորժելի գույնի, կպչունություն ապահովելու և այլ նկատառումներով, օգտագործվում են մեծաքանակ հավելանյութեր, ինչի մասին սպառողը տեղյակ չէ: Ըստ հանձնաժողովի՝ երշիկի արտադրության ընթացքում օգտագործվել է սոյա, օսլա, սպիտակաձավար (манная крупа), ալյուր, նիտրիտ, ֆոսֆատ:
Նշված հավելանյութերի՝ առողջությանը հասցված վնասի մասին 168.am-ը զրուցեց ՀՀ առողջապահության նախարարության Պետական հիգիենիկ և հակահամաճարակային տեսչության սնուցման և սննդամթերքի անվտանգության բաժնի պետ Մարգարիտա Բաբայանի հետ: Վերջինս նշեց, որ երշիկների և առհասարակ սննդամթերքի մեջ հավելանյութերի, մասնավորապես՝ նիտրիտի և ֆոսֆատի քանակի սահմանված չափ կա. «Եթե դրանք նորմայի մեջ են, ապա ոչ մի վտանգ չի սպառնում մարդկանց»:
Նշենք, որ ըստ ՀՀ կառավարության «Սննդային հավելումներին ներկայացվող պահանջների» տեխնիկական կանոնակարգի (հավելված N 1 ՀՀ կառավարության 2011 թվականի հուլիսի 7-ի N 993-Ն որոշման), նիտրիտները ջերմային մշակման չենթարկված, չոր ապխտած մսամթերքի 1կիլոգրամում կարող են պարունակվել 50 մգ չափով, իսկ այլ ապխտած, պահածոյացված մսամթերքում՝ 100 մգ: Ըստ կառավարության նշված որոշման՝ նիտրիտների տեխնոլոգիական ֆունկցիան պահածոյացնող նյութ լինելն ու գույնը կայունացնելն է:
Տեխնիկական կանոնակարգի համաձայն՝ ֆոսֆատների տեխնոլոգիական ֆունկցիաները հետևյալն են՝ թթվայնության կարգավորիչ, հակաoքuիդացնող, էմուլգատոր, տեքuտուրատոր, խոնավությունը պահպանող ազդակ, կայունացնող, համալիր առաջացնող, հացի և ալյուրի որակի բարելավիչ, պնդացմանը և գնդիկավորմանը խոչընդոտող, փխրունացնող, խտարար, պահածոյացնող, ներկ կայունացնող, համ և բույր ուժեղացնող: 1 կգ մսամթերքում ֆոսֆատների պարունակությունը չպետք է գերազանցի 5 գրամը:
Անդրադառնալով վերջերս Սննդամթերքի անվտանգության պետական ծառայության կատարած ստուգումներին, որոնց արդյունքում պարզվել էր, որ չանախ պանրում առկա են աղիքային ցուպիկի մանրէներ, Մարգարիտա Բաբայանը նշեց, որ դրանք կարող են հանգեցնել որոշակի խնդիրների:
Ըստ նրա`եթե աղիքային ցուպիկի մանրէները պանրում գերազանցում են թույլատրելի սահմանը, դրանք կարող են աղիքային հիվանդությունների կամ խանգարումների հանգեցնել: «Աղիքային ցուպիկի մանրէների մեջ են մտնում Citrobacter, Enterobacter մանրէները, որոնց մեծ քանակը կարող է բերել աղիքային երևույթների՝ սրտխառնոց, փսխում, լուծ, և այլն: Ջերմաստիճանը, սննդի տեսակը կարող են բարենպաստ պայմաններ ստեղծել դրանց համար: Իհարկե, գերադասելի է, որ պանրում աղիքային ցուպիկներ առհասարակ չլինեն»:
