ԱՊՀ երկրների բժշկական բուհերի ներկայացուցիչների հանդիպում Երևանում
Սեպտեմբերի 27-ին Երևանի պետական բժշկական համալսարանում (ԵՊԲՀ) մեկնարկել է ԱՊՀ երկրների բժշկական բուհերի երիտասարդական գիտական կառույցների ֆեդերացիայի 9-րդ նստաշրջանը։ Այն կազմակերպել են Հայաստանի երիտասարդական հիմնադրամը և ԵՊԲՀ ուսանողական խորհրդարանը։
ԵՊԲՀ ուսանողական խորհրդարանի նախագահ Կարեն Հակոբյանը նշել է, որ ԵՊԲՀ-ն մշտապես պահպանել է գիտական համագործակցությունն այլ երկրների բուհերի հետ, և մեր երկրում այս նստաշրջանի անցկացումը դրա ապացույցն է։ Ըստ Կ. Հակոբյանի՝ Հայաստանում նստաշրջանի անցկացումը կնպաստի ԱՊՀ երկրների բժշկական բուհերի կապերի ամրապնդմանը, փորձի փոխանակմանը, նոր կապերի ձևավորմանը։ Եռօրյա նստաշրջանի ընթացքում կքննարկվեն երիտասարդական գիտական կառույցների գործունեության կառավարման և ֆինանսավորման հարցեր, վեր կհանվեն առկա խնդիրները, և կնախանշվեն դրանց լուծման ուղիները։
ԱՊՀ երկրների բժշկական բուհերի երիտասարդական գիտական կառույցների ֆեդերացիայի փոխնախագահ Ալեքսանդր Սարանդաևը նշել է, որ ֆեդերացիան գործունեության ընթացքում առաջին անգամ է նիստ գումարում Հայաստանում։ «ԱՊՀ երկրներում վերակազմավորվել են ուսանողական, գիտական, երիտասարդական կազմակերպությունները, փոխվել են ենթակառույցները, գործունեության մեթոդները։ Բնականաբար, ծառացել են նոր խնդիրներ, և մեր նպատակն է գտնել այդ խնդիրների լուծման տարբերակներն ու իրականացնել փորձի փոխանակում այլ երկրների ներկայացուցիչների հետ։ Կարծում եմ՝ փորձի փոխանակումն էլ ավելի արդյունավետ կդարձնի բոլոր կողմերի աշխատանքը»,- նշել է Ա. Սարանդաևը՝ ավելացնելով նաև, որ առաջիկայում տերբեր երկրների բժշկական բուհեր հանդես կգան համատեղ ծրագրերով, որպեսզի ընդլայնվեն գիտական համագործակցության ոլորտները։
