Զոհված Սասուն Մկրտչյանը պատրաստվում էր ամուսնանալ. ծառայակիցները պատմում են զինառայողի մասին
Կոնդի Սուրբ Հովհաննես եկեղեցում այսօր տեղի ունեցավ Արցախում զոհված զինծառայող Սասուն Մկրտչյանի հոգեհանգստի արարողությունը: Սասուն Մկրտչյանը ծնվել է 1989թ., պայմանագրային զինծառայող է, հետախույզ-գնդացրորդ:
Հրամանատարի՝ անձնակազմի հետ տարվող աշխատանքների գծով տեղակալ, փոխգնդապետ Արթուր Դանիելյանն ասաց, որ Սասուն Մկրտչյանին կարող է բնութագրել միայն ու միայն՝ որպես դրական զինծառայող: «Մոտ չորս տարի է՝ արդեն ինքը ծառայում է մեր զորամասում: Նա կամավոր եկել է մեր զորամաս և ցանկություն է հայտնել ծառայել հանուն հայրենիքի: Նա շատ ընկերասեր էր: Նա շատ պարտաճանաչ զինծառայող էր: Բազմաթիվ անգամներ խրախուսվել է հրամանատարության կողմից, տարբեր տեսակի պատվոգրերով, արժեքավոր նվերներով, դրամական պարգևով, ինչպես նաև՝ մեդալներով: Շատ պարտաճանաչ զինծառայող էր»,- ասաց Արթուր Դանիելյանը: Նրա խոսքով՝ Սասուն Մկրտչյանի նման զինծառայողներ շատ կան. «Ցավոք, ինքն այսօր ֆիզիկապես մեր կողքին չէ, բայց ես վստահ եմ, որ մյուս զինծառայողներն իր գործը կշարունակեն,- ասաց նա՝ շարունակելով,- Կարող եմ ասել, որ նա կոնկրետ այս դեպքով շատ մեծ հերոսություն է կատարել, որի արդյունքում իր կյանքը՝ իր ամենաթանկ բանն է տվել՝ հանուն մեր հայրենիքի»:
Սասուն Մկրտչյանի ծառայակից ընկերը նրան բնութագրեց՝ որպես ընկերասեր, մարդամոտ, նվիրված, ազնիվ մարդ. «Երկար տարիներ է՝ միասին ծառայում ենք ՊԲ-ում: Ընկերոջ համար կյանք տվող զինծառայող էր: Նաև սպորտսմեն էր: Մի խոսքով՝ շատ լավ անձնավորություն էր, շատ դուխով, միշտ առաջ գնացող էր»: Նա վստահեցրեց, որ Սասունի գործն իրենք կավարտեն: «Միասին շատ անգամ ենք դիրքերում եղել, ուղղակի այս անգամ, ցավոք սրտի, մարտական խնդիր կատարելիս` հակառակորդին պատժիչ հարված տալիս, զոհվեց մեր մարտական ընկերը»,- ասաց ծառայակիցը՝ նշելով, որ Սասուն Մկրտչյանը շուտով պետք է ամուսնանար. «Իր ցանկությունը դա էր առաջնային»: Դեռ մանուկ հասակից Սասուն Մկրտչյանը հետաքրքրվել և զբաղվել է սպորտով, Մուայթայի ֆեդերացիայի անդամ էր:
