Բացվեց Խաչատուր Ազիզյանի ստեղծագործությունների ցուցահանդեսը (լուսանկարներ)
Այսօր Նկարիչների միության Մեծ դահլիճում բացվեց Նկարիչների միության նախագահի տեղակալ, պրոֆեսոր Խաչատուր Ազիզյանի ստեղծագործությունների ցուցահանդեսը:
Ունենալով բազմաթիվ ցուցահանդեսներ Ֆրանսիայում, ԱՄՆ-ում, Իտալիայում, Լիբանանում, Ֆինլանդիայում, Կորեայում և այլուր՝ այդուհանդերձ սա նրա առաջին անհատական ցուցահանդեսն էր Երևանում: Ցուցահանդեսին ներկայացված էին շուրջ 87 ստեղծագործություններ, որոնք արվել էիր 1975-ից մինչև 2014թ.:
Ցուցահանդեսի բացման արարողությանը ներկա էին նրա ընկերները, հարազատները, մեծանուն մտավորականներ, նկարիչներ, ինչպես նաև արվեստի բազմաթիվ սիրահարներ:
Խ. Ազիզյանը մեզ հետ զրույցում նշեց, որ յուրաքանչյուր նկարիչ միշտ հետաձգում է իր ստեղծագործությունների ցուցահանդեսը՝ մտածելով, որ դեռ շուտ է, բայց այս անգամ վերջապես որոշում կայացվեց նման ցուցահանդեսի բացման. «Նկարիչը պետք է այնպիսի աշխատանքներ ներկայացնի, որ մարդկանց թվա, թե դրանց հեղինակները տարբեր մարդիկ են: Նկարիչը չի կարող ամեն ինչ նույն ձևով, նույն գույնով, նույն տրամադրություններով ներկայացնել: Հենց դա է պատճառը, որ ամեն նկար յուրովի ու տարբեր ոճերի մեջ եմ ներկայացրել»:
Ճարտարապետ, Գեղագիտության ազգային կենտրոնի գլխավոր տնօրեն Լևոն Իգիթյանը իր տպավորություններով կիսվեց` ասելով, որ Խ. Ազիզյանն այսօր իր համար հայտնագործություն էր. «Սա այն ցուցահանդեսն է, որ մի երկու օրից նորից պետք է գամ ու լուրջ նայեմ: Իհարկե լինում են ցուցահանդեսներ, որ հետք չեն թողնում մարդու մեջ, բայց այստեղ նայելու բան կա, և անպայման էլի պիտի գամ»:
