ՀԱԿ պատգամավոր. «Ժառանգության» մասով մի փոքր դժվար է կողմնորոշվել, որովհետև ամեն մեկը մի բան է ասում
ԱԺ ՀԱԿ խմբակցության պատգամավոր Լյուդմիլա Սարգսյան կարծում է՝ Րաֆֆի Հովհաննիսյանի հայտարարությունը, որ դեկտեմբերի 5-ին «Ժառանգությունը» քաղաքացիական հանդիպումներ է կազմակերպում, եռյակի պառակտում չի նշանակում և ինքը ոչ մի բացառիկ բան չի տեսնում այդտեղ: Այսօր՝ լրագրողների հետ հանդիպման ժամանակ նա նշեց, որ Րաֆֆի Հովհաննիսյանը երևի ինչ-որ «բաց դռների օր է» հայտարարելու հասարակության հետ հանդիպման համար:
Հիշեցնենք, որ այսօր «Ժառանգություն» կուսակցության նախագահ Րաֆֆի Հովհաննիսյանը հայտարարել է, որ դեկտեմբերի 5-ին, ժամը 17:00-ին ինքը ՀՀ քաղաքացիներին հրավիրում է քաղաքացիական հավաքի:
Դիտարկմանը՝ Րաֆֆի Հովհաննիսյանը հայտարարեց, որ եռյակը միասնական չէ, միասնական օրակարգ չունի, Լ. Սարգսյանն այսպես արձագանքեց.
«Անկեղծ ասած, «Ժառանգության» մասով մի փոքր դժվար է կողմնորոշվել, որովհետև ամեն մեկը մի բան է ասում: Տվյալ դեպքում, ես չեմ կարծում, որ այդ կարծիքը կիսում է Ռուբիկ Հակոբյանը՝ խմբակցության ղեկավարը, որովհետև գիտեմ նրա տրամադրությունները: Դ մի բանի մասին է խոսում, որ «Ժառանգության» կուսակցության ներսում ամեն ինչ նորմալ չէ ու ամեն ինչ չի քննարկվում հետո ներկայացվում, բայց կարծում եմ՝ դա ևս հաղթահարելի է: Ես կարծում եմ՝ պրոցեսն արդյունավետ առաջ տանելու և հասնելու ժողովրդի կողմից ցանկալի իշխանափոխությանը միայն մեկ ճանապարհ կա՝ համախմբում և համատեղում մեր բոլորի ջանքերն ու մարտավարական գործիքները: Ես կարծում եմ՝ մենք դրան կհասնենք»:
Հարցին՝ այսինքն՝ Ռ. Հակոբյանի հայատարարությունը գերադասո՞ւմ եք Ր. Հովհաննիսյանի հայտարարությունից, ՀԱԿ պատգամավորն այսպես պատասխանեց.
«Այդ դեպքում, «Ժառանգության» մեջ ամեն ինչ այնպես չէ, ինչպես մենք ենթադրում ենք, որովհետև խմբակցությունը կուսակցություն է ներկայացնում: Եռյակում միջխմբակցային հարաբերություններ են, ես հակված եմ կարևոր համարելու խմբակցության ղեկավարի տեսակետը, որը վարում է հիմնական բանակցությունները, իսկ թե գիշերը Րաֆֆի Հովհաննիսյանն ինչ է մտածել, ես այդ մասին ոչինչ չեմ կարող ասել: Խնդիրը փորձեք նրանցից ճշտեք, մենք «Ժառանգություն» խմբակցության հետ որևէ խնդիր չունենք»:
