Պետական բյուջեից 4.8 միլիարդ դրամ (շուրջ 12 միլիոն դոլար) տրամադրվեց ազգային ավիափոխադրող ստեղծելու նպատակով՝ մեծ խոստումներով ու հույսերով, սակայն երկու տարի անց այդ նախաձեռնությունից մնաց միայն անվանումը։ Ո՛չ գումարն է վերադարձվել, ո՛չ էլ ավիաընկերությունը գոյատևել։ Նման ահռելի միջոցներով հիմնադրված ընկերությունը նույնիսկ երկու տարի չդիմացավ շուկայական մրցակցությանը, և այդ փուչիկը պայթեց Ազգային ժողովում։
Չեղած բանի համար մարդկանց բռնում նստեցնում են, տարիներով դատում են, շոուներ են սարքում, վարկաբեկում են, վերջում էլ ոչինչ չեն կարողանում ապացուցել՝ ստիպված գործերը կարում են, իսկ որ իրենք ակնհայտորեն պետությանը միլիարդավոր դրամների վնաս են պատճառել, հարկատուների վճարած փողերը բյուջեից հանել, չգիտես՝ ո՞ւմ են տվել, ի՞նչ են արել, ինչի՞ համար են տվել, ինչպե՞ս են ծախսել, զրո արդյունք են ստացել, պարզվում է, ոչ ոք մեղավոր չէ։ Չեն ուզում պատասխան տալ իրենց գործած մեղքերի համար, որը պետության վրա շատ թանկ է նստել, միլիարդներ է արժեցել։
