Մոտ մեկ ամիս է՝ Կոտայքի մարզի Քասախ համայնքի բնակիչները բողոքի ակցիաներ են իրականացնում, որոնք ուղեկցվում են Երևան-Աշտարակ ճանապարհը փակելով։ Քասախցիները պահանջում են չեղարկել որոշումը, ըստ որի՝ Քասախը Երևանին կապող միակ՝ 59 համարի ավտոբուսը պետք է հանեն երթուղուց և այն փոխարինեն «գազելով»։ Նրանք մի քանի անգամ արդեն հանդիպել են պատկան մարմինների ներկայացուցիչների հետ, սակայն որևէ փոփոխություն տեղի չի ունեցել, նրանց պահանջները չեն կատարվել։
«Այսօր բոլորն են ֆինանսական ճգնաժամի մեջ, կարելի է, չէ՞, մի քիչ այս ժողովրդի դրության մեջ մտնել։ Սա օրը ցերեկով գողություն է, մտնում են մեր գրպանը։ Գիտե՞ք ինչ, այսօր ոմանք խուսափում են քաղաքականությունից խոսել, ասում են՝ մենք քաղաքականությամբ չենք զբաղվում, վախենում են, որ վերադասն իրենց կարող է ճնշել։ Բայց ինքս որևէ բանից չեմ վախենում, որովհետև իմ պահանջը ճիշտ է, մենք հո չե՞նք ասում՝ աշխատեք, մեզ տվեք, ասում ենք՝ թող գոնե մեր աշխատածով ապրենք։
