«Մեր բուհերում կարևոր խնդիր է գործնական աշխատանքների կազմակերպման տևողության հարցը»
ՀՀ կրթության եւ գիտության նախարարությունը կրթական չափորոշիչները սահմանելու գործընթացում կարեւորում է գործատուների մասնակցությունը:
Լրագրողների հանդիպմանը այս մասին ասաց Կրթության և գիտության նախարարության բարձրագույն ուսումնական հաստատությունների համակարգման եւ վերահսկման բաժնի պետ Սասուն Մելիքյանը:
Նա բուհ-աշխատաշուկա կապի մեջ կարեւորեց կարիերայի կենտրոնների առկայությունը, որոնք ուղղորդում են դիմորդին մասնագիտական ընտրության հարցում` գործատուի պահանջները հաշվի առնելով: «Մեր բուհերում կարեւոր խնդիր է գործնական աշխատանքների կազմակերպման տեւողության հարցը, որը հաճախ շատ կարճ է լինում»,-ասաց նա: Կան մասնագիտություններ, որտեղ հմտությունը շատ անհրաժեշտ է, օրինակ՝ բանկային գործը»,-ասաց նա:
Սասուն Մելիքյանը նշեց, որ բուհերում որոշ մասնագիտությունների պահպանման խնդիր կա: «Այդ պատճառով մենք այս մասնագիտությունների գծով անվճար տեղեր ենք հատկացնում, որպեսզի դրանք պահպանվեն»,-ասաց բանախոսը:
Հայաստանի ուսանողական ազգային ասոցիացիայի անդամ Մարիամ Եվդոկիմովայի խոսքով` բուհերն այսօր ավելի շատ են կարեւորում հիմնարար գիտելիքները, իսկ գործատուն` կարողությունները: «Ուսանողները բավարարված են բուհում սերտած տեսական գիտելիքներով, սակայն գործնական գիտելիքներն այնքան էլ բավական չեն»,-ասաց նա՝ առաջարկելով մոդել ստեղծել, որում ներգրավված կլինեն ե՛ւ բուհը, ե՛ւ գործատուն:
