Հառլեմ Դեզիրը ԼՂՀ վերաբերյալ երեք ուղերձով է եկել Հայաստան
Լեռնային Ղարաբաղի հակամարտության խաղաղ կարգավորման բանակցությունները պետք է վերսկսվեն: Բանակցություններն իսկապես անհրաժեշտություն են, որպեսզի հնարավոր լինի խուսափել բռնության այնպիսի դրսևորումներից, ինչպիսիք եղան բոլորվին վերջերս: Ծիծեռնակաբերդի հուշահամալիրում լրագրողների հետ զրույցում այս մասին ասաց Ֆրանսիայի Եվրոպական հարցերի պետքարտուղար Հառլեմ Դեզիրը:
«Պետք է բոլորս միավորենք մեր ուժերը, որպեսզի կարողանանք ի զորու լինել կերտելու հարատև, կայուն խաղաղություն տարածաշրջանում՝ հիմնված ամենակարևոր երեք հիմնական սկզբունքների վրա՝ ուժի չկիրառում, ազգերի ինքնորոշման իրավունք և տարածքային ամբողջականություն: Սա է այն ուղերձը, որով ես այստեղ եմ»,- նշեց նա:
Դեզիրը հավելեց, որ առաջին հերթին հարկավոր է վստահության մեխանիզմներ ստեղծել՝ սահմանային միջադեպերի հետաքննության տեխնիկական միջոցների կիրառման եղանակով: «Հակամարտության խաղաղ կարգավորմանն ուղղված բանակցությունների վերսկումն ու վստահության մեխանիզմների ներդրումը կլինի հիմնական շեշտադրումն այն քաղաքական հանդիպումների, որոնք ես կունենամ Երևանում և վաղը Բաքվում»,- եզրափակեց պետքարտուղարը:
