Հարություն Խաչատրյանը՝ Հայաստանի ազգային կինոակադեմիայի նոր նախագահ
Հայաստանի Ազգային կինոակադեմիայի հերթական նիստը, որ տեղի է ունեցել փետրվարի 5-ին՝ գլխավորությամբ կինոգետ Դավիթ Մուրադյանի, նոր նախագահ է նշանակել:
Ինչպես հաղորդում է «Ոսկե Ծիրան» Երևանի միջազգային կինոփառատոնի լրատվական ծառայությունը, Հայաստանի ազգային կինոակադեմիայի հերթական նիստի ընթացքում հաշվետու ելույթով հանդես է եկել Կինոակադեմիայի նախագահ Դավիթ Մուրադյանը՝ ամփոփելով չորս տարվա ընթացքում Հայաստանի Ազգային կինոակադեմիայի կատարած աշխատանքները:
Դավիթ Մուրադյանի առաջարկով Հայաստանի ազգային կինոակադեմիայի հաջորդ փուլի ղեկավարման համար նոր նախագահ է ընտրվել Եվրոպական կինոակադեմիայի անդամ, «Ոսկե Ծիրան» Երևանի միջազգային կինոփառատոնի տնօրեն Հարություն Խաչատրյանը, գլխավոր քարտուղար՝ կինոքննադատ Րաֆֆի Մովսիսյանը:
Հարություն Խաչատրյանի ղեկավարությամբ մարտ ամսին նախատեսվում է գումարել Հայաստանի ազգային կինոակադեմիայի բաց նիստ, որի ընթացքում կներկայացվի առաջիկա երկու տարիների գործունեության ծրագիրը և կազմակերպության թարմացված կանոնադրությունը:
