ՈՒԵՖԱ-ն սպառնում է Հայաստանին՝ Պորտուգալիայի հետ խաղի ժամանակ Շահեն Հարությունյանի ակցիայի համար
Արդեն տեղեկացրել ենք, որ Հայաստան-Պորտուգալիա խաղի ժամանակ տեղի է ունեցել ոչ ֆուտբոլային իրադարձություն. առաջին խաղակեսի ավարտին խաղադաշտ էր մտել «Ցեղակրոն» կուսակցության հիմնադիր Շանթ Հարությունյանի որդին՝ Շահեն Հարությունյանը, ով ակցիայի միջոցով պահանջում էր ազատ արձակել իր հայրիկին և բոլոր քաղբանտարկյալներին:
Այս իրադարձության պատճառով Հայաստանը կարող է վճարել մեծ տուգանք:
ՈՒԵՖԱ-ի աշխատակիցները պատրաստել են հատուկ զեկուցում՝ կապված դեպքի հետ: Այս զեկուցման հիման վրա ՈՒԵՖԱ-ի կարգապահական կոմիտեն կկայացնի որոշում՝ պատժե՞լ Հայաստանին, թե՞ ոչ:
Սովորաբար նման խախտման դեպքում, երբ խաղադաշտ է վազում երկրպագու, տուգանքը կազմում է 80-130 հազար եվրո: Բացի այդ, Շահեն Հարությունյանը բարձրացրել էր քաղաքական բնույթի պաստառ, որը նույնպես համարվում է կանոնների կոպիտ խախտում:
Թե ինչ պատիժ կկրի Հայաստանը՝ կորոշվի ՈՒԵՖԱ-ի քննարկումներից հետո, բայց մի բան հստակ է՝ եթե նման դեպք կրկնվի, ապա Հայաստանը նվազագույնը 1 խաղ կանցկացնի առանց երկրպագուների:
Սիրարփի Աղաբաբյան
