Մերկելն ու Պորոշենկոն քննարկել են Դոնբասում տիրող իրավիճակը
Ռուսական ИТАР-ТАСС լրատվական գործակալության փոխանցամբ՝ Գերմանիայի կանցլեր Անգելա Մերկելն ու Ուկրաինայի նախագահ Պյոտր Պորոշենկոն հեռախոսազրույցի ժամանակ քննարկել են Դոնբասում տիրող իրավիճակն ու հակամարտության խաղաղ կարգավորման շուրջ երկխոսություն հաստատելու համար անհրաժեշտ քայլերը:
Այս մասին հայտնել է Ուկրաինայի նախագահի մամլո ծառայությունը, որի հաղորդմամբ՝ Պորոշենկոն Մերկելին կոչ է արել ԵՄ-ի ներսում ու միջազգային արենայում անել ամեն բան՝ աջակցելու համար Ուկրաինային: Կանցլերն իր հերթին վստահեցրել է, որ պատրաստ է պաշտպանել ԵՄ-ի վճռական գործողությունները:
Նա հայտարարել է, որ օգոստոսի 30-ին կգումարվի ԵՄ-ի Խորհրդի նիստը, և ԵՄ-ը պետք է ի ցույց դնի Ուկրաինայի հետ իր համերաշխությունը: Այդ համատեքստում նրանք քննարկել են նիստի մասնակից եվրոպացի առաջնորդներին Պորոշենկոյի դիմելու հնարավորությունը:
