20 համարի ավտոբուսի վարորդը հրաժարվել է քշել. «Եթե 100 դրամ եք տալիս, ուրեմն չեմ քշում, քշում եմ պարկ»
Քիչ առաջ Ավան վարչական շրջանում` Բուսաբանական այգու մոտակայքում, 20 համարի (4563 պետհամարանիշերով) ավտոբուսի վարորդը կանգնեցրել է մեքենան և հրաժարվել է շարունակել երթուղին: Այս մասին 168.am-ի հետ զրույցում ասաց ավտոբուսի ուղևորներից մեկը` Վահե Մխիթարյանը:
Վերջինիս խոսքով` երիտասարդ վարորդն իրեն բավական ջղաձիգ է դրսևորել և բոլոր ուղևորներից պահանջել է իջնել ավտոբուսից, երբ ուղևորները հայտարարել են, որ չեն պատրաստվում ուղեվարձի համար վճարել 150 դրամ:
«Ասում էր` եթե 100 դրամ եք տալիս, ուրեմն չեմ քշում, քշում եմ պարկ»,- վարորդի խոսքը մեջբերեց Վ.Մխիթարյանը: Նա նաև տեղեկացրեց, որ ուղևորների մի մասը, այդ թվում և ինքը իջել են ավտոբուսից և հեռացել, իսկ ոմանք մնացել են, սակայն թե ինչով է ավարտվել այս պատմությունը, արդյոք վարորդը վերադարձե՞լ է ավտոպարկ, թե՞, ի վերջո, շարունակել է կատարել իր աշխատանքը, մեզ չհաջողվեց պարզել:
Հիշեցնենք, որ քաղաքային տրանսպորտի ուղեվարձի բարձրացման դեմ բողոքի ակցիաները շարունակվում են արդեն 5-րդ օրն անընդմեջ:
