Իրանի ԶՈւ Գլխավոր շտաբ. Մենք կշարունակենք դիմակայությունը ԱՄՆ-ի և Իսրայելի դեմ մինչև թշնամու լիակատար պարտությունը
Իրանի զինված ուժերի Գլխավոր շտաբը հայտարարել է ԱՄՆ-ի և Իսրայելի դեմ դիմակայությունը շարունակելու մտադրության մասին՝ մինչև հակառակորդների «լիակատար պարտությունը» և իրանցի ժողովրդի իրավունքների իրագործումը, հաղորդում է Tasnim-ը.
Հայտարարությունը հրապարակվել է կիրակի՝ 1980–1988 թվականների իրանա-իրաքյան պատերազմի ավարտից հետո գերության մեջ գտնված զինծառայողների Իրան վերադարձի տարելիցի առթիվ։ Գլխավոր շտաբը հարգանքի տուրք է մատուցել նախկին ռազմագերիների հիշատակին և շնորհավորել պատերազմի վետերաններին ու նրանց ընտանիքներին։
Հայտարարության մեջ ութամյա պատերազմը, որը Իրանում անվանում են «Սրբազան պաշտպանություն», բնութագրվում է որպես «պատվի, հպարտության և ազգային ինքնության» աղբյուր։ Ինչպես նշել են Իրանի բանակի ԶՈւ Գլխավոր շտաբում, այդ ժամանակահատվածի փորձը իրանցիների համար դարձել է ինքնուրույնության, ազատության ձգտման, ճնշմանը դիմադրության, առաջնորդին հավատարմության և քաղաքական գիտակցության խորհրդանիշ։
Գլխավոր շտաբը նաև հայտարարել է, որ իրանական երիտասարդությունը ներկայիս դիմակայության ընթացքում դուրս է եկել ընդդեմ «հանցավոր Ամերիկայի», որին նա անվանել է աշխարհի ամենազինված ռազմական ուժը։ Հայտարարության մեջ պնդում է արվում, որ իրանցիները գործել են Իսլամական հեղափոխության նահատակ առաջնորդ այաթոլլա Սեյեդ Ալի Խամենեի կոչով և ներկայիս առաջնորդ այաթոլլա Սեյեդ Մոջթաբա Խամենեի ղեկավարությամբ՝ «ծնկի բերելով թշնամու առաջնորդներին»։
Իրանի զինված ուժերը, ասվում է այնուհետև, մտադիր չեն հրաժարվել այն պահանջներից, որոնք Թեհրանը համարում է օրինական, և կշարունակեն դիմակայությունը ԱՄՆ-ի դեմ։
Գլխավոր շտաբը ընդգծել է, որ իրանական զինված ուժերը կգործեն մինչև «տարածաշրջանում ամերիկա-սիոնիստական թշնամիների լիակատար պարտությունը, իրանցի ժողովրդի իրավունքների իրագործումը և հակառակորդի կապիտուլյացիան»։
