ԻԱԿ-ը Ազգային ժողովից պահանջում է չխախտել տեղեկատվություն ստանալու իր իրավունքը
![](https://168.am/wp-content/uploads/2012/11/AJ-nist-14.11.12.jpg)
«Փաստինֆոյի» փոխանցմամբ՝ ՀՀ վարչական դատարանում՝ դատավոր Անի Հարությունյանի նախագահությամբ, այսօր տեղի ունեցավ «Ինֆորմացիայի ազատության կենտրոն» հասարակական կազմակերպությունն ընդդեմ ՀՀ Ազգային ժողովի հայցադիմումի գործով առաջին նախնական դատական նիստը:
ԻԱԿ ներկայացուցիչ Կարեն Մեժլումյանը պնդեց հայցը, որով խնդրում է ճանաչել հայցվորի իրավունքի խախտման փաստը և պատասխանողին պարտավորեցնել տրամադրել ՀՀ Ազգային ժողովի նախագահի թիվ 10,12,13,14,19,44,48,49,50,59,66,72, այսինքն՝ թվով 12 կարգադրությունների պատճենները, ինչպես նաև պատասխանողից բռնագանձել դատական ծախսերի գումարը:
Ըստ հայցվոր կողմի, հիշյալ կարգադրությունները չտրամադրելով խախտվել է իր տեղեկատվություն ստանալու իրավունքը, այսինքն՝ խախտվել են ՀՀ Սահմանադրության 27.1 և 27-րդ հոդվածները, ինչպես նաև «Տեղեկատվության ազատության մասին» ՀՀ օրենքի 1-ին, 3-րդ, 6-րդ և 9-րդ հոդվածները:
Պատասխանող կողմի ներկայացուցիչ, ՀՀ Ազգային ժողովի իրավաբանական վարչության պետի տեղակալ, խորհդատու Սոնա Թևանյանը պնդեց իր պատասխանը, որով առարկել է հայցի դեմ: Պատասխանող կողմի ներկայացուցիչը նշեց, որ հայցվոր կողմին տրամադրվել է 127 էջից բաղկացած տեղեկատվություն, չեն տրամադրվել միայն հիշյալ 12 կարգադրությունների պատճենները, որոնք աշխատողների անհատական տվյալներ են պարունակել՝ հիմնվելով «Անհատական տվյալների մասին» ՀՀ օրենքի ու Աշխատանքային օրենսգրքի համապատասխան դրույթների վրա:
Ի պատասխան հայցվոր կողմի առաջարկի ներկայացնել հիշյալ կարգադրությունների բովանդակությունը՝ առանց անհատական տվյալներ նշելու, պատասխանող կողմի ներկայացուցիչը պատրաստակամություն հայտնեց այն ներկայացնել որպես դատավարական փաստաթուղթ: Այսօր էլ կողմը պատրաստ էր ներկայացնել համապատասխան տեղեկանքը, սակայն այն ստորագրված չէր, այսինքն, դատարանի գնահատմամբ՝ պատշաճ փաստաթուղթ չէր:
Այն ներկայացնելու համար դատարանը նշանակեց ևս մեկ նախնական դատական նիստ՝ օգոստոսի 7-ին:
2012թ. նոյեմբերի 22-ին հայցվոր կողմը տեղեկատվություն ստանալու խնդրանքով դիմել էր ՀՀ Ազգային ժողովին, դեկտեմբերի 5-ին ստացվել էր պատասխան՝ առանց պահանջվող տեղեկատվության, տեղեկատվությունը ստացվել էր ի պատասխան 2013թ. մարտի 4-ի հարցման՝ երեք օր անց՝ մարտի 7-ին, սակայն այս անգամ էլ չէին տրամադրվել խնդրո առարկա 12 կարգադրությունների պատճենները: