Shell-ը գնորդ է գտել վերականգնվող էներգետիկայի իր ակտիվների համար
Shell ընկերության հարյուր տոկոսանոց դուստր ձեռնարկությունը՝ Shell Overseas Investment B.V.-ն, համաձայնագիր է ստորագրել հնդկական Aditya Birla Renewables Limited (ABRen) ընկերության հետ՝ Solenergi Power Private Limited ընկերության բաժնետոմսերի 100%-ը վաճառելու վերաբերյալ, որի կազմի մեջ է մտնում Sprng Energy խումբը: Գործարքի արժեքը կազմում է 1,8 միլիարդ դոլար:
Sprng Energy-ի ակտիվները ներառում են 5 ԳՎտ հզորությամբ վերականգնվող էներգիայի աղբյուրներ, որոնցից 3,3 ԳՎտ-ը բաժին է ընկնում գործող հողմային և արևային էլեկտրակայաններին, իսկ 1,7 ԳՎտ-ը՝ կառուցվող օբյեկտներին: Shell-ը վաճառքը բացատրում է ակտիվների պորտֆելի օպտիմալացման և դեպի «ճկուն» գեներացնող հզորություններ վերակողմնորոշման անհրաժեշտությամբ: Ընկերությունը նախատեսում է մինչև 2030 թվականը հասցնել օգտագործվող միջին կապիտալի շահութաբերությունը (ROACE) մինչև 10%-ի։ Խոսքը ներդրված ամբողջ կապիտալի արդյունավետության մասին է, ներառյալ սեփական և փոխառու միջոցները:
Սա նշանակում է հրաժարում ցածր եկամտաբերություն ունեցող ակտիվներից և էլեկտրաէներգետիկայի այնպիսի դիրքերի պահպանում, որոնք կապահովեն պատշաճ շահույթ՝ անկախ էներգիայի աղբյուրից: Միևնույն ժամանակ, Shell-ը հազիվ թե լինի միակ ընկերությունը, որը կվերանայի «կանաչ» օրակարգի ժողովրդականության գագաթնակետին ընդունված ներդրումային որոշումները:
