Երևանը պետք է գիտակցի, որ պանիրը ԵՄ մկան թակարդում անվճար չի լինելու. Սլուցկի
Հայաստանի ղեկավարությունը պետք է գիտակցի, որ պանիրը «եվրոպական մկան թակարդում» անվճար չի լինելու, հայտնել է Պետդումայի միջազգային հարցերով հանձնաժողովի նախագահ Լեոնիդ Սլուցկին՝ մեկնաբանելով հայկական արտահանման 80 տոկոսի համար միության երկրներ մաքսատուրքերը չեղարկելու ԵՄ ծրագրերը։
Հինգշաբթի Եվրոպական հանձնաժողովի նախագահ Ուրսուլա ֆոն դեր Լայենը Երևանում հայտարարել է, որ ԵՄ-ը նախատեսում է չեղարկել միության երկրներ հայկական արտահանման 80 տոկոսի մաքսատուրքերը։ Նրա կարծիքով՝ այս մեխանիզմը Եվրոպայի դռները կբացի Հայաստանի թարմ գյուղատնտեսական արտադրանքի, բանջարեղենի, մրգերի և օրգանական արտադրանքի գրեթե 99 տոկոսի, ինչպես նաև ալկոհոլային և ոչ ալկոհոլային խմիչքների արտահանման 90 տոկոսի համար։
«Հիմա ճշմարտության այն պահն է, երբ Հայաստանի ղեկավարությունը պետք է իրականում գիտակցի՝ պանիրը եվրոպական մկան թակարդում անվճար չի լինելու», – գրել է Սլուցկին իր թելեգրամ-ալիքում։
Պատգամավորի կարծիքով՝ առևտրային արտոնություններն ապագայում երկրի տարածքում հակառուսական հենակետ ստեղծելու ուկրաինական փորձը ներդնելու վճարն են։ Նա հավելել է, որ նման քայլի բացասական հետևանքներն առաջին հերթին իր վրա կզգա հայ ժողովուրդը։
«Եվ «երկու աթոռին նստել» չի ստացվի։ Այս մասին նույնպես բազմիցս ասվել է։ Կամ Երևանի անդամակցություն ԵԱՏՄ-ին՝ Ռուսաստանի և միության մյուս անդամների հետ կապերի ու համագործակցության պահպանմամբ, կամ եվրոպական ինտեգրում, ինչը նշանակում է ինքնիշխանությունից փաստացի հրաժարում և Բրյուսելի պրոտեկտորատի հաստատում… Եվ սա արդեն ոչ թե «փորձի ներդրում» է, այլ ճակատագրական սխալների կրկնություն՝ պետությունն արտաքին կառավարման հանձնելու միջոցով», – եզրափակել է Սլուցկին։
