Թուրքիայում մեկ օրում ավելի քան 20 երկրաշարժ է գրանցվել
Չորեքշաբթի օրը Թուրքիայի տարբեր շրջաններում երկրաշարժերի շարք է արձանագրվել։ Ամենաուժեղ ստորգետնյա ցնցումն ունեցել է 3,6 մագնիտուդ, վկայում են Եվրոպական-միջերկրածովյան սեյսմոլոգիական կենտրոնի (EMSC) տվյալները։
Սեյսմոլոգների տեղեկություններով՝ ամենահզոր երկրաշարժը տեղի է ունեցել տեղական ժամանակով 09:31-ին երկրի արևելքում։ Դրա էպիկենտրոնը գտնվել է Վան քաղաքից (որի բնակչությունը կազմում է մոտ 371 հազար մարդ) դեպի հարավ-արևմուտք մոտ 55 կմ հեռավորության վրա և Գևաշ քաղաքից 26 կմ հեռավորության վրա։ Երկրաշարժի օջախը գտնվել է 7 կմ խորության վրա։
EMSC-ի տվյալներով՝ օրվա սկզբից Թուրքիայի տարբեր տարածաշրջաններում ավելի քան 20 ստորգետնյա ցնցում է տեղի ունեցել։ Մնացած երկրաշարժերի մագնիտուդը չի գերազանցել 2,8-ը։
Հրապարակման պահին տուժածների կամ ավերածությունների մասին տեղեկություններ չեն ստացվել։
