ԱՄՆ-ն Իրանի նկատմամբ «գործողությունների տարբերակներ» ունի. Վենս
ԱՄՆ փոխնախագահ Ջեյ Դի Վենսը հայտարարել է, որ Վաշինգտոնը պահպանում է «գործողությունների տարբերակներ»՝ «Իրանի կողմից միջուկային ծրագիրը վերականգնելու կամ զինված խմբավորումներին աջակցելու փորձերի դեպքում», գրում է The Times of Israel-ը։
Ելույթ ունենալով Վիրջինիա նահանգի ռազմածովային ավիաբազայի զինծառայողների առջև՝ նա ընդգծել է, որ ԱՄՆ-ն շարունակում է ռազմավարական ճնշում գործադրել Թեհրանի վրա։
Վենսը նշել է, որ ամերիկյան ռազմական հարվածներն, ըստ ԱՄՆ հետախուզության գնահատականների, զգալիորեն դանդաղեցրել են իրանական միջուկային ծրագրի զարգացումը։
«Եթե նայեք, թե ինչ է ասում մեր հետախուզությունը նրանց միջուկային ծրագրի մասին, ապա նրանք ավելի հեռու են միջուկային ռումբ ստեղծելուց, քան երբևէ վերջին 20 կամ 30 տարվա ընթացքում»,- ասել է նա։
Միաժամանակ, նա չի կրկնել իրանական միջուկային ծրագրի «լիակատար ոչնչացման» մասին նախագահ Դոնալդ Թրամփի ավելի կոշտ հայտարարությունները։
Ըստ Վենսի՝ գործողությունների նպատակը եղել է երկրի ռազմական ներուժի թուլացումը, որպեսզի այն վերականգնելու փորձերի դեպքում սպառնալիք չներկայացնի։
Նա հայտարարել է նաև, որ Թրամփի վարչակազմը բանակցություններ է վարում Իրանի հետ ուժի դիրքերից, և ընդգծել է, որ ռազմական գործողությունները պետք է ունենան հստակ նշված նպատակներ, այլ ոչ թե իրականացվեն «սոսկ հարվածներ հասցնելու համար»։
Վենսը հավելել է, որ ԱՄՆ-ի վերջին հարվածները պատասխան էին առևտրային նավագնացության դեմ Իրանի գործողություններին և, նրա բնորոշմամբ, հնարավորություն են տվել վերականգնել նավերի ազատ տեղաշարժը տարածաշրջանում։
