Քանի դեռ ես Իսրայելի վարչապետն եմ, Իրանը միջուկային զենք չի ունենա․ Նեթանյահու
Իսրայելի վարչապետ Բենիամին Նեթանյահուն հայտարարել է, որ Իրանը չպետք է ունենա միջուկային զենք, և ընդգծել է, որ այս դիրքորոշումը տասնամյակներ շարունակ մնում է անփոփոխ։
X սոցիալական ցանցում իր հրապարակման մեջ նա նշել է, որ այս հարցի շուրջ լիակատար համաձայնություն կա ԱՄՆ նախագահ Դոնալդ Թրամփի հետ։ «Քանի դեռ ես Իսրայելի վարչապետն եմ, Իրանը միջուկային զենք չի ունենա», — հայտարարել է Նեթանյահուն։
Նա հավելել է, որ ավելի քան 30 տարի գտնվում է «Իրանի միջուկային ծրագրի դեմ միջազգային արշավի առաջնագծում»՝ պնդելով, որ առանց այդ ջանքերի Թեհրանն արդեն կարող էր միջուկային զենք ունենալ։
Ըստ Իսրայելի վարչապետի, Իրանը շարունակում է ձգտել Իսրայելի ոչնչացմանը, և դրա կանխումը նա անվանել է իր հիմնական խնդիրներից մեկը։ «Ես կյանքս նվիրել եմ նրան, որ դա տեղի չունենա», — ասվում է հայտարարության մեջ։
Նեթանյահուն նաև կրկնել է, որ քանի դեռ զբաղեցնում է վարչապետի պաշտոնը, Իրանի կողմից միջուկային զենքի ձեռքբերումն անհնար է։
