Հոտը հովվի կարիք ունի, հովիվը գայլերի հետ կերուխումի է. Մելիքյանը` Վրթանես սրբազանին
Երևանի Արցախի թեմի առաջնորդարանի մոտ հավաքված մարդիկ ցանկանում էին հանդիպել Արցախի թեմի առաջնորդ Վրթանես եպիսկոպոս Աբրահամյանի հետ։ Նրանք ցանկանում էին պարզաբանում ստանալՎրթանես եպիսկոպոս Աբրահամյանից, թե ինչու է նա օրեր առաջ հանդիպել Նիկոլ Փաշինյանի հետ։
Արցախցի փաստաբան Ռոման Երիցյանը զանգեց Վրթանես սրբազանին, սակայն նրա զանգերն անպատասխան մնացին։
«Արցախցիների մոտ խորը ցավ և զայրույթ է առաջացրել, որ Արցախի թեմի առաջնորդը ձեռք է սեղմել ՀՀ վարչապետին, ավելին՝ խոնարհվել նրա առջև այն բանից հետո, ինչ կատարվեց Արցախի և արցախցիների նկատմամբ»,- ասաց Երիցյանը։
Նա չբացառեց, որ իշխանությունները սրբազանի դեմ կոմպրոմատներ ունեն, իսկ թե ինչպիսիք՝ ինքը չգիտի։
Արցախի նախկին ՄԻՊ, փաստաբան Ռուբեն Մելիքյանն էլ հայտարարեց.
«Գուցե Վրթանես սրբազանը գերու կարգավիճակում է գտնվում, թող դուրս գա ասի։ Ասի, որ, ժողովուրդ ջան, գերու կարգավիճակում եմ, կներեք, բայց մարդկանց հետ պետք է հանդիպի։
Ինձ համար անհասկանալի է` ինչու սրբազանը հարկ չի համարել հանդիպել մարդկանց հետ, երբ հովվի կարիք կա, իսկ հովիվը գայլերի հետ գտնվում է կերուխումի մեջ»,- ասաց Ռուբեն Մելիքյանը։
