«Աշխատում եմ հայ պատանիների հետ». Լևոն Արոնյանը փակագծեր է բացել
ԱՄՆ-ն ներկայացնող գրոսմայստեր Լևոն Արոնյանն աշխատում է Հայաստանի պատանի շախմատիստների հետ: Նա այդ մասին պատմել է ՖԻԴԵ-ին Հնդկաստանում ընթացող Աշխարհի գավաթի խաղարկության չորրորդ փուլում տարած հաղթանակից հետո:
Արոնյանը շարունակում է վստահ առաջ շարժվել մրցաշարում։ Նա 1,5 : 0,5 հաշվով հաղթելով Ռադոսլավ Վոյտաշեկին՝ դուրս է եկել հաջորդ փուլ: Հաղթանակից հետո Լևոնը պատմել է, թե ովքեր են օգնում իրեն։
«Ես խաղին վերադարձա հիմնականում ընկերներիս, հատկապես Ֆաբիի (ամերիկացի գրոսմայստեր Ֆաբիանո Կարուանա. խմբ.) շնորհիվ: Մենք աշխատում ենք իրար հետ։ Նաև աշխատում եմ Սալեմի հետ (Սալեմ Սալեհ, գրոսմայստեր ԱՄԷ-ից. խմբ.), ոչ հենց հիմա՝ Աշխարհի գավաթում, բայց պարբերաբար հանդիպում ենք և աշխատում:
Դա օգնում է ինձ հասկանալ, թե ինչպես են մտածում երիտասարդ խաղացողները։ Ես նաև աշխատում եմ հայ պատանիների հետ՝ հասկանալու համար, թե ընդհանրապես ինչ ուղղությամբ է զարգանում շախմատը», – ասել է Արոնյանը։
Նշենք, որ Հնդկաստանի Գոա քաղաքում ընթացող Աշխարհի գավաթի խաղարկությունում Լևոն Արոնյանն անցել է չորս փուլ՝ հաջորդաբար հաղթելով Արոնյակ Գոշին (Հնդկաստան), Սալեմ Սալեհին (ԱՄԷ), Ռադոսլավ Վոյտաշեկին (Լեհաստան): Հինգերորդ շրջանի առաջին պարտիայում Արոնյանը ոչ-ոքի է խաղացել հնդիկ գրոսմայստեր Արջուն Էրիգայսիի հետ:
