Բարդիները Երեւանում համարվեցին վտանգավոր. Դրանք ծեր են ու պետք է փոխարինվեն
Դավիթաշեն վարչական շրջանից մինչև Ծիծեռնակաբերդի բարձրունք նոր ջրագիծ ենք բերել՝ 300 միլիմետր տրամագծով: Այս մասին քաղաքապետարանի հերթական գործակարգավարական խորհրդակցության ժամանակ նշել է Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանը:
«Դա բերվել է ոչ միայն այդ 10 հեկտարի համար, այլ հաշվի է առնվել ամբողջ շուրջ 90 հեկտար տարածքի ոռոգումը ապահովելու համար:
Վերջերս Նորք-Մարաշի լանջերում շուրջ 7 հեկտարի վրա Մարաշի այգիները վերականգնվեցին։ Վերջին երկու տարիների ընթացքում Երևանում անցկացվել և արդիականացվել է 60 կմ-ից ավել ոռոգման համակարգ։ Վերջին երկու տարիների ընթացքում Երևան քաղաքը ստեղծել է մի մեծ, ջերմոցատնկարանային տնտեսություն 30 հեկտար տարածքի վրա: Անցկացվել է 100 կիլոմետր կաթիլային ոռոգման համակարգ և ստեղծվել և գեներացվել են այնպիսի հզորություններ, որի արտադրանքը, երբ արդեն կմատակարարվի, բավարարելու է ոչ միայն Երևան քաղաքին, այլև ամբողջ Հայաստանի Հանրապետությանը, դեռ մի բան էլ ավելի»,-ասաց նա:
Բեգոյանն ընդգծեց, որ Երեւանում ծառերը հավիտենական չեն եւ պետք է փոխվեն. «Ամեն տարի Երևան քաղաքում տնկում ենք շուրջ մեկ տասնյակ հազարի հասնող ծառատեսակներ, որից, որոնք առաջվա նման ճիպոտներ չեն հիշեցնում, դրանք հասուն ծառեր են, 10 տարեկան, որոշ դեպքերում և ավելի:
Ցավոք սրտի Երևան քաղաքում թանկարժեք երկար ապրող ծառերի հետ միասին 50-ականներին նաև տնկվել են շատ կարճ արագ կանաչապատելու համար Երևան քաղաքը, տնկվել են շատ կարճ կյանք ունեցող և արագ աճող որոշակի ծառատեսակներ, դա թեղին է և բարդին, որը քաղաքային պայմաններում ունի 40-50 տարվա կյանք, դա վաղուց անցել է, մոտենում է 70-80 տարվան, ինչի արդյունքում ունենք բազմաթիվ դրանց տապալման դեպքեր, քամատապալման, ձնատապալման և ընդհանրապես տապալման դեպքեր:
Այստեղ կա ոչ միայն Կանաչ ֆոնդը փրկելու հարց, որը պետք է արվի էկոլոգիական նպատակներով, այլ նաև կա երևանցիների անվտանգության հարց և օր առաջ այդ ծառատեսակները պետք է փոխարինվեն Երևան քաղաքում, որը նաև արվել է այս տարի»,- ընդգծեց Բեգոյանը:
Նա տեղեկացրեց, որ այս տարի Բագրատունյաց, Թումանյան, Ալեքյան Մանուկյան, Խանջյան և Ուլնեցի փողոցներում ամբողջովին փոխարինվել են ծառատեսակները» «Թումանյանի մի մասն է մնացել: Ծեր, ոչինչ չանող ծառերը փոխարինվել են ավելի արժեքավոր և այո, ավելի գեղազարդ ծառատեսակներով»:
