Իսրայելն ավիահարվածներ է հասցրել Բեյրութի արվարձաններին
Իսրայելի ռազմաօդային ուժերի կործանիչներն առնվազն 5 ավիահարված են հասցրել Լիբանանի մայրաքաղաքի հարավային արվարձաններին, որտեղ գտնվում են «Հեզբոլլահ» կազմակերպության օբյեկտները։ Այս մասին հաղորդում է Reuters գործակալությունը։Հարվածները Բեյրութը ցնցել են առավոտվա ժամերին։
Պայթյուններից առաջ Իսրայելի պաշտպանության բանակը սոցցանցերում անվանել է Բեյրութի հարավային արվարձաններում 12 վայր և բնակչությանը հայտնել շուտով այնտեղ գրոհ իրականացնելու մասին։ Տուժածների մասին տեղեկություններ չեն հաղորդվել։
Reuters-ը նշում է, որ սեպտեմբերի իսրայելական ռմբակոծությունների մեկնարկից հետո բնակիչները հիմնականում հեռացել են Բեյրութի հարավային արվարձաններից։ Իսրայելի հյուսիսում ևս հնչել են օդային տագնապի ազդանշաններ, բնակիչները շտապել են ռմբապաստարաններ։ ԻՊԲ-ն հայտնել է Լիբանանի տարածքից արձակված օդային թիրախների մասին։ Տուժածների մասին տեղեկություններ չեն հաղորդվել։
Գազայի հատվածում Իսրայելի և ՀԱՄԱՍ-ի միջև ռազմական գործողությունների ընթացքում Իսրայելի և «Հեզբոլլահ»-ի միջև հակամարտությունը սրվել է։ Սեպտեմբերի վերջից Իսրայելը սկսել է հարվածներ հասցնել Լիբանանում շարժման թիրախներին։
Իսրայելի պաշտպանության նախարար Իսրայել Կացը հայտարարել է, որ Լիբանանում հրադադար չի լինի. Իսրայելը կշարունակի հարվածներ հասցնել «Հեզբոլլահ» շարժմանն այնքան ժամանակ, մինչև չհասնի պատերազմի իր նպատակներին։ Լիբանանի առողջապահության նախարարության տվյալներով՝ վերջին մեկ տարվա ընթացքում իսրայելական գնդակոծությունների հետևանքով զոհվել է շուրջ 3200 մարդ, վիրավորվել՝ ավելի քան 14 000-ը:
