ԱՄՆ Ներկայացուցիչների պալատի հանձնաժողովը հավանություն է տվել ՄՔԴ-ի դեմ պատժամիջոցների օրինագծին
ԱՄՆ Կոնգրեսի Ներկայացուցիչների պալատի ընթացակարգերի հանձնաժողովը հունիսի 3-ին հավանություն է տվել այն օրինագծին, որը Վաշինգտոնին հնարավորություն կտա պատժամիջոցներ սահմանել Միջազգային քրեական դատարանի (ՄՔԴ) դեմ՝ ԱՄՆ-ի ու նրա դաշնակիցների նկատմամբ նրա կողմից անցկացված հետաքննությունների համար: Նիստը հեռարձակվել է կոմիտեի կայքում։ Այդ մասին տեղեկանում ենք The Hill հրատարակությունից:
Փաստաթղթին կողմ է քվեարկել 9 օրենսդիր, 3-ը դեմ են արտահայտվել։ Հանրապետականների նախաձեռնությամբ ներկայացված օրինագծի տեքստում ընդգծվում է, որ Վաշինգտոնի վարչակազմը պետք է պատժամիջոցներ սահմանի ՄՔԴ-ի դեմ, եթե այդ մարմինը «փորձի հետաքննություն անցկացնել, ձերբակալել, կալանավորել կամ պատասխանատվության ենթարկել որևէ անձի, որը գտնվում է պաշտպանության ներքո: Այս կատեգորիային են պատկանում ամերիկացիները, ներառյալ՝ զինվորականները, բոլորը, ովքեր աշխատում են ԱՄՆ-ի կառավարության համար, Վաշինգտոնի դաշնակից երկրների քաղաքացիները, եթե այդ պետությունները չեն ճանաչում ՄՔԴ-ի իրավասությունը:
Նշված դեպքերում ամերիկյան սահմանափակումները կարող են տարածվել նաև այն անձանց վրա, որոնք աջակցում են ՄՔԴ-ի աշխատանքին: Պատժամիջոցների ցուցակում ընդգրկվելը նշանակում է այցագրերի մերժում, ակտիվների սառեցում ԱՄՆ-ում և ԱՄՆ-ի քաղաքացիների ու ընկերությունների համար արգելք` բիզնես վարելու պատժամիջոցների ցանկում հայտնված անձանց հետ։
Պլանավորվում է, որ օրինագիծը հունիսի 4-ին կքննարկի ԱՄՆ- Կոնգրեսի Ներկայացուցիչների պալատը:
Մայիսին ՄՔԴ դատախազ Քարիմ Խանը դիմել է Նախաքննական պալատին՝ Իսրայելի վարչապետ Բենիամին Նեթանյահուի և երկրի պաշտպանության նախարար Յոավ Գալանտի, ինչպես նաև պաղեստինյան ՀԱՄԱՍ արմատական շարժման երեք բարձրաստիճան պաշտոնյաների ձերբակալման հրամաններ ստանալու համար՝ նշելով, որ ողջամիտ հիմքեր կան կարծելու, որ նրանք պատասխանատվություն են կրում «պատերազմական հանցագործությունների և մարդկության դեմ հանցագործությունների համար»:
