Զելենսկին սխալվել է` կարծելով, թե ԵՄ-ի բոլոր արկերն անվճար են լինելու. Բրետոն
Ներքին շուկայի հարցերով եվրահանձնակատար Տիերի Բրետոնը հայտարարել է, որ Ուկրաինայի նախագահ Վլադիմիր Զելենսկին սխալվել է` խոսելով այն մասին, որ Եվրամիությունը Ուկրաինային ընդամենը 300 հազար արկ է փոխանցել խոստացված միլիոնից։
Հունվարի վերջին ԵՄ դիվանագիտության ղեկավար Ժոզեպ Բորելը հայտարարել էր, որ 2024 թվականի սկզբին դաշինքի երկրներն Ուկրաինային ավելի քան 300 հազար արկ են մատակարարել։ Նրա խոսքով` մինչև 2024 թվականի մարտ համայնքի երկրները կկարողանան Կիևին մատակարարել խոստացված մեկ միլիոն զինամթերքի ավելի քան կեսը։ Սա պայմանավորված է արկերի արտադրության ձգձգումներով, ինչպես նաև սեփական պաշարների սպառման վերաբերյալ երկրների մտավախություններով։
Բրետոնն այսօր «Franceinfo» ռադիոկայանի եթերում հայտարարել է, որ այս առիթով Զելենսկու ասածը չի համապատասխանում իրականությանը։
«Իրականությունն այն է, որ անցյալ տարվա մարտին 27 անդամ երկրներ որոշում կայացրին մեկ տարվա ընթացքում մեկ միլիոն արկ մատակարարել… Ես ասացի «մատակարարել», ոչ թե «փոխանցել»»,- ասել է Բրետոնը` հավելելով, որ Զելենսկին խոսել է անհատույց փոխանցման մասին։
Բրետոնի խոսքով` զինամթերքի մատակարարման երեք ճանապարհ կա, որոնցից մեկն իսկապես հենց անհատույց փոխանցումն է։ Հենց այդ նախաձեռնության շրջանակում է Կիևին փոխանցվել 300 հազար արկ, իսկ մարտի վերջին այդ թիվը կհասնի 550 հազարի։
«Մատակարարման ևս երկու այլ ուղի կա: Առաջինը` Ուկրաինան արկեր է գնում անմիջապես մեր արտադրական բազայից։ Նա արդեն ավելի քան 350 հազար արկ է գնել։ Այսպիսով դառնում է 900 հազար … Այնուհետև կան նաև երկկողմ մատակարարումներ որոշ հարևան պետությունների միջև, որոնք չեն բացահայտվում»,- հավելել է եվրահանձնակատարը։
Այսպիսով` Բրետոնը սուտ է անվանել այն, որ Եվրամիությունը չի կարողանա Ուկրաինային մեկ միլիոն զինամթերքով ապահովել, քանի որ մարտի վերջին Կիևը կունենա 550 հազար արկ, որոնք կփոխանցվեն անհատույց:
«Ընդհանուր թիվը (փոխանցված արկերի. խմբ.) զգալիորեն գերազանցում է մեկ միլիոնը»,-ամփոփել է եվրահանձնակատարը։
Ռուսաստանն ավելի վաղ ՆԱՏՕ-ի երկրներին բողոքի նոտա էր հղել Ուկրաինային ռազմամթերք մատակարարելու համար։ ՌԴ ԱԳ նախարար Սերգեյ Լավրովը նշել էր, որ ցանկացած բեռ, որն Ուկրաինայի համար նախատեսված ռազմամթերք կպարունակի, Ռուսաստանի համար օրինական թիրախ կդառնա։ ՌԴ արտաքին քաղաքական գերատեսչությունում հայտարարել էին, որ ՆԱՏՕ-ի երկրները, Ուկրաինային ռազմամթերք մատակարարելով, կրակի հետ են խաղում։
