Զաքիր Հասանովը որոշել է ընդօրինակել Սուրեն Պապիկյանի` անձնակազմի հրապարակային որակավորման գաղափարը
![](https://168.am/wp-content/uploads/2024/01/414576923_364936026154831_4181116132248562851_n.jpg)
Ադրբեջանի պաշտպանության նախարար Զաքիր Հասանովի հաստատած պլանի համաձայն, Ադրբեջանի զինված ուժերում անցկացվում են սպաների և զինծառայողների որակավորման քննություններ, որոնք անցկացվում են դաշտային և ոչ դաշտային պայմաններում:
Ադրբեջանի պաշտպանական գերատեսչության հաղորդմամբ, մասնավորապես, ստուգվում են քննություններին ներգրավված անձանց համապատասխան նորմատիվ և այլ փաստաթղթերի իմացությունը, ֆիզիկական և կրակային պատրաստության մակարդակը, ավելին՝ զինծառայողները կատարել են նաև մարտական մեքենաների և ավտոմոբիլային տեխնիկայի վարման և կառավարման ստուգողական խնդիրներ:
Ադրբեջանի ՊՆ հաղորդագրության մեջ նշվում է, որ այս ամենի նպատակն է՝ ստուգել զինված ուժերի անձնակազմի և զինծառայողների մարտական պատրաստվածության և մասնագիտական գիտելիքների ու կարողությունների, և, առհասարակ, անձնակազմի պրոֆեսիոնալիզմի մակարդակը կամ աստիճանը:
Հետաքրքիր է, որ Ադրբեջանի պաշտպանության նախարարությունը, ըստ էության, ընդօրինակելով ՀՀ պաշտպանական գերատեսչության ՀՀ ԶՈՒ անձնակազմի և սպաների հրապարակային ատեստավորման քաղաքականությունը, ևս իր բանակի անձնակազմի որակավորման քննություններն անցկացրել է հրապարակային՝ հաղորդագրությանը կցելով լուսանկարներ ու տեսանյութ, որտեղ երևում է, թե ինչպես են ադրբեջանցի սպաները վազում, ֆիզիկական վարժություններ անում և կրակում:
Ուշագրավ է, որ Ադրբեջանը որոշել է նախագահական արտահերթ ընտրություններին ընդառաջ նման քարոզչական քայլերի գնալ և ընդօրինակել ՀՀ պաշտպանության նախարարության գաղափարները, այդ թվում՝ տեղեկատվական առումով: Հարցն այն է, որ Ադրբեջանը սրան զուգահեռ՝ նաև հարձակողական զորավարժություններ է իրականացնում և, ըստ էության, չի պատրաստվում խաղաղության: