Ռուսաստանում ուժի մեջ մտավ ՌԴ քաղաքացիություն ստանալու հեշտացված գործընթացը

Ռուսաստանում ուժի մեջ է մտել օտարերկրացիների ու առանց քաղաքացիության անձանց՝ հեշտացված կարգով ՌԴ քաղաքացիություն ստանալու ֆեդերալ օրենքը, մի փաստաթուղթ, որը, մասնավորապես, բացառում է արդեն իսկ ունեցած քաղաքացիությունից հրաժարումը ու կրճատում է քաղաքացիություն ստանալու համար ՌԴ տարածքում մնալու ժամկետը:

Այս մասին տեղեկացնում է news.mail.ru-ն՝ հղում անելով РИА Новости-ին:

Համապատասխան ֆեդերալ օրենքը ՌԴ նախագահ Վլադիմիր Պուտինը ստորագրել է 2020թ. ապրիլին:

Նախկինում օրենսդրությունը ռուսական քաղաքացիություն հայցողին պարտադրում էր հրաժարվել տվյալ երկրի քաղաքացիությունից, նոր դիմել ՌԴ քաղաքացիություն ստանալու համար:

Նոր օրենքը նաև թույլ է տալիս բացառել ՌԴ քաղաքացիություն ստացողների համար ՌԴ տարածքում 3 տարի ապրելու ու ապրելու համար օրինական միջոցների առկայության ապացույցի պարտադիր պահանջը առանց քաղաքացիության անձանց, ԽՍՀՄ քաղաքացիություն ունեցողների, նախկին ԽՍՀՄ երկրներում ապրող, բայց այդ երկրի քաղաքացիությունը չստացած անձանց համար:

Նույն նորմը կտարածվի նաև ՌԴ-ում ապրող ՌԴ քաղաքացիների հետ ամուսնացած ու տվյալ ամուսնությունից երեխաներ ունեցող անձանց, ինչպես նաև այն օտարերկրացիների վրա, ում ծնողներից մեկն ունի ՌԴ քաղաքացիություն և ապրում է Ռուսաստանում:

Բացի դրանից, Մոլդովայի, Ուկրաինայի, Բելառուսի և Ղազախստանի քաղաքացիների համար նույնպես հեշտացվում է ՌԴ քաղաքացիություն ստանալու կարգը: Նրանք կարող են դիմել առանց ՌԴ-ում ապրելու պահանջին հետևելու, եթե ունեն գործող կեցության իրավունք:

Երեք տարուց մինչև մեկ տարի է դառնում նաև ՌԴ-ում աշխատանքային գործունեություն ծավալելու պահանջն այն անձանց համար, ովքեր ռուսական բուհեր են ավարտել:

Պատրաստեց 168.am–ը