Ռուսաստանն արձագանքել է ԵՄ-ի և ԱՄՆ-ի սահմանած նոր պատժամիջոցներին
ԱՄՆ ֆինանսների նախարարության կողմից ռուսական «Ռոսնեֆտ» և «Լուկօյլ» նավթային ընկերությունների դեմ պատժամիջոցներ կիրառելու որոշումը հակաարդյունավետ է և որևէ հատուկ խնդիր չի ստեղծի Մոսկվայի համար, հայտարարել է Ռուսաստանի արտաքին գործերի նախարարության խոսնակ Մարիա Զախարովան ճեպազրույցի ժամանակ։ Այս մասին հաղորդում է «ՌԻԱ Նովոստի»-ն։
«Մեր երկիրը զարգացրել է ամուր իմունիտետ արևմտյան սահմանափակումների նկատմամբ և կշարունակի վստահորեն զարգացնել իր տնտեսական և էներգետիկ ներուժը», – նշել է Զախարովան։
Նա հավելել է, որ սահմանափակումների միջոցով Մոսկվային ինչ-որ գործողությունների մղելու՝ ԱՄՆ նախկին վարչակազմի փորձերը ևս տապալվել են, իսկ արդյունքում տուժել է համաշխարհային տնտեսության կայունությունը: Զախարովան նաև ընդգծել է, որ Ռուսաստանը պատրաստ է ԱՄՆ-ի հետ շփումների արտաքին քաղաքական գերատեսչությունների մակարդակով և ոչ մի խոչընդոտ չի տեսնում ռուս-ուկրաինական հակամարտության լուծման ուղղությամբ նախագահներ Վլադիմիր Պուտինի և Դոնալդ Թրամփի նախաձեռնած գործընթացը շարունակելու համար:
Անդրադառնալով Եվրամիության պատժամիջոցներին՝ Զախարովան նշել է, որ դրանց ընդլայնման հնարավորություններն արդեն սպառվել են, իսկ սահմանափակումները վնաս են հասցնում հենց Եվրոպական միությանը:
Դիվանագետը նաև նշել է, որ Եվրամիության կողմից ռուսական ակտիվների բռնագրավման ցանկացած գործողություն իրավաբանորեն անվավեր է և կհանգեցնի Մոսկվայի կողմից ցավոտ արձագանքի։
«Ռուսական ակտիվների հետ կապված ցանկացած գործողություն առանց Ռուսաստանի համաձայնության անվավեր է միջազգային և պայմանագրային իրավունքի տեսանկյունից։ Բրյուսելի կողմից ցանկացած բռնագրավման նախաձեռնություն կհանգեցնի երաշխավորված, ցավոտ արձագանքի։ Մենք կգործենք միջազգային հարաբերություններում փոխադարձության սկզբունքին լիովին համապատասխան՝ հիմնվելով մեր սեփական շահերի և Ռուսաստանին պատճառված վնասը փոխհատուցելու անհրաժեշտության վրա», – ասել է Զախարովան։
Իր հերթին Ռուսաստանի Անվտանգության խորհրդի փոխնախագահ Դմիտրի Մեդվեդևը պատժամիջոցներ սահմանելու ԱՄՆ-ի որոշումն անվանել է Ռուսաստանի դեմ պատերազմական գործողություն։
«Սա չի փոխում գլխավորը. ընդունված որոշումները Ռուսաստանի դեմ պատերազմի ակտ են», – գրել է Մեդվեդևը իր Telegram ալիքում։
Ավելի վաղ ԱՄՆ-ն և Եվրամիությունը հայտարարել էին հակառուսական նոր պատժամիջոցների մասին։
ԱՄՆ նախագահ Դոնալդ Թրամփը հայտարարել է, որ չեղարկել է Բուդապեշտում Ռուսաստանի նախագահ Վլադիմիր Պուտինի հետ նախատեսված հանդիպումը, բայց ապագայում պլանավորում է հանդիպել նրա հետ։
