«Վանեցյանը, մեծ հաշվով, անցյալի արձագանքն է». Արմեն Գրիգորյան
Անվտանգության խորհրդի քարտուղար Արմեն Գրիգորյանը Կառավարության նիստից հետո լրագրողների հետ զրույցում անդրադարձել է նաև երեկ ԱԱԾ նախկին տնօրեն Արթուր Վանեցյանի՝ տպագիր մամուլի գլխավոր խմբագիրների հետ հանդիպման ժամանակ Վանեցյանի հնչեցրած հայտարարություններին:
– Արթուր Վանեցյանը՝ խոսելով հիբրիդային հեղաշրջման ու իր անվան հետ դրանք կապելու մասին՝ ասել էր, որ դրանք անլուրջ հայտարարություններ են: Ինչպե՞ս կարձագանքեք դրան:
– Ճիշտն ասած, ծանոթ չեմ հարցազրույցին, բայց չեմ էլ ակնկալում, որ պատասխանն այնպիսին պետք է լինի, որ արձագանքելու անհրաժեշտություն լինի:
– Խմբագիրների հետ երեկ հանդիպման ժամանակ նա ասաց, որ ներկայիս իշխանություններն այնպես են անում, որ կարծես այլընտրանքը նախկիններն են, բայց դա այդպես չէ: Երբ ինքը գա իշխանության, ես մոտավոր իմաստն եմ ասում, որ ինքը նույնպես դեմ կլինի, թույլ չի տա, որ Հայաստանը վերադառնա անցյալին: Եվ, միևնույն ժամանակ, ասաց, որ ինքը զգուշացնում էր վտանգները, որ կային, և, մասնավորապես, նշեց Բուքիքիոյի հայտարարությունները, որպես վտանգ ներկայացրեց: Ի՞նչ կարող եք ասել այդ կապակցությամբ:
– Ես կարծում եմ, որ ընդհանուր միջազգային կառույցների արձագանքի տեսանկյունից իրեն պետք է ընդհանուր կոնտեքստի մեջ նայել, և ես լուրջ խնդիրներ միջազգային կառույցների կողմից, որպես հայտարարություն, այդպիսին չեմ տեսնում: Հայաստանի ժողովրդավարացման գործընթացը շարունակվելու է, այդտեղ մենք որևիցե հարցում հետընթաց չենք ունենալու և ժողովրդարության կառուցման մեջ առաջին հերթին հետաքրքրված ենք մենք և մեր ժողովուրդը: Եվ ես համոզված եմ, որ բոլոր այն խնդիրները, որոնք գոյություն ունեն ժողովրդավարացման պրոցեսում, մենք առաջնահերթությունը տալու ենք ներքին քաղաքականությանը և ներքին պահանջին՝ իհարկե, աշխատելով նաև միջազգային հանրության հետ, և միջազգային հանրության կողմից արձագանքների մեջ ես որևիցե, մեծ հաշվով, խնդիր չեմ տեսնում:
Ինչ վերաբերում է …
– Վերադարձ անցյալին, որ Վանեցյանը խոստանում էր թույլ չտալ: Ի՞նչ կարող եք ասել:
– Վանեցյանը, մեծ հաշվով, անցյալի արձագանքն է:
– Երբ դեռ նոր էր Արթուր Վանեցյանը պաշտոնանկ արվել, խոսելով Հայաստանում օտարերկրյա քաղաքական ֆինանսավորում ունեցող կուսակցությունների մասին՝ նա ասել էր, որ այդպիսիք Հայաստանում կան: Դուք ինչպիսի՞ տվյալներ ունեք: Կա՞ն այնպիսի քաղաքական ուժեր, որոնք դրսից են ֆինանսավորվում:
– Կարծում եմ՝ եթե նա ունի տվյալներ, պետք է հրապարակի դա և հստակեցնի, նաև, եթե աշխատանքի ժամանակ է այդպիսի ինֆորմացիա ունեցել, նա պետք է որ զեկուցած լինի:
– Արթուր Վանեցյանը հարցազրույցում նաև նշեց, որ իշխանությունում կան մարդիկ, որոնք դավաճանեցին հեղափոխությանը: Ինչպե՞ս կարձագանքեք:
– Ընդհանրապես քաղաքացիների հույսերը, ես համոզված եմ, մեծամասամբ արդարացվել է: Իհարկե, քաղաքացիները ունեն պահանջներ, որոնք մենք դեռ չենք կարողացել արդարացնել: Ես համոզված եմ, որ մեզ հավելյալ ժամանակ է պետք արդարացնելու, բայց Հայաստանում կատարված բարեփոխումների այն ծավալը, որը տեղի է ունեցել վերջին 2 տարիների ընթացքում՝ տնտեսական աճը, ճանապարհաշինությունը, սպառազինությունների ձեռքբերումը, բանակում կատարվող բարեփոխումները, տարածքային կառավարումից մինչև օրենսդրական դաշտում կատարվող բարեփոխումները, խոսում են նրա մասին, որ Հայաստանում մեծ մասով կատարվել են քաղաքացիների ակնկալիքները:
Ավելին, ես համոզված եմ՝ շատ հարցերում, նույնիսկ ինչ իրականություն ստեղծվել է, այդպիսի ակնկալիք չի եղել: Ես համոզված եմ, որ, օրինակ, 2018 թվականի մայիսին ոչ մեկը չէր պատկերացնում, որ 2019 թվականի ընթացքում Հայաստանում 500 կմ ճանապարհ կկառուցվի: Ոչ մեկը երբեք չէր պատկերացնում, որ 2019-ի ընթացքում մենք 4 ՍՈՒ ձեռք կբերենք: Այդպիսի ակնկալիքներ, մեծ հաշվով, 2018-ին չի եղել: Ես կարծում եմ, որ շատ հարցերում քաղաքացիների ակնկալիքները երբեմն գերազանցվել են, բայց եղել են հարցեր, որ չեն գերազանցվել, և մենք աշխատում ենք, որ քաղաքացիների ակնկալիքներին համապատասխան քաղաքականություն վարենք:
Եվ մի կարևոր բան էլ կա: Ընդհանրապես իրողության փոփոխության հետ՝ նաև քաղաքացիների պահանջներն են փոխվում: Այսինքն, երբ որ մենք կառուցել ենք 500 կմ ճանապարհ, դրանով քաղաքացիների ակնկալիքները չեն սպառվել: Նոր ակնկալիքներ ձևավորվել են, և այդ առումով, կարծում եմ, որ նորմալ է, որ քաղաքացիները պարբերաբար շարունակում են իրենց ակնկալիքների նշաձողը բարձրացնել, և մենք պատրաստ ենք այդ բարձրացված նշաձողերին համապատասխան քայլեր ձեռնարկել: Ես համոզված եմ, որ մենք հեղափոխության ակնկալիքները, մեծ մասով, արդարացրել ենք: Իսկ այն մասով, որ դեռ չենք հասցրել արդարացնել, ժամանակի ընթացքում միանշանակ կարդարացնենք:
– Արթուր Վանեցյանը նաև նշեց, որ այլևս զբաղվելու է ակտիվ քաղաքականությամբ: Այս մասով ի՞նչ կասեք: Եվ ի՞նչ եք կարծում, կարո՞ղ է պարոն Վանեցյանը լինել Ձեր իշխանությանը հակակշիռ, այլընտրանք:
– Նայեք, որպեսզի ես պատկերացնեմ՝ հակակշիռ լինելու հնարավորություն ունի՞, թե՞ չէ, ես կփորձեի պատկերացնել, օրինակ, այս հրապարակում (Հանրապետության հրապարակ:- Ա.Հ.) 150 հազար քաղաքացի նրա կողքին կանգնած և նրա հրապարակային խոսքը լսելուց: Երբ որ, կարծում եմ, 100-150 հազար հոգի լինեն, կարող ենք այդ հարցը քննարկել:
Մանրամասները՝ 168.am-ի տեսանյութում
