Ուռուցքաբանության ազգային կենտրոնում քաղցկեղի վիրահատությունների թիվը մոտ 32 տոկոսով ավելացել է
Վ. Ա. Ֆանարջյանի անվան ուռուցքաբանության ազգային կենտրոնում 2019-ին կատարվել է չարորակ նորագոյացությունների 2562 վիրահատություն՝ 2018-ի 1850-ի դիմաց: Տնօրենը վստահեցնում է՝ աճը պայմանավորված է ոչ թե նոր դեպքերով, այլ նրանով, որ վիրահատական բուժումը դարձել է անվճար: Տնօրեն Նարեկ Մանուկյանն այս մասին ասաց փետրվարի 4-ին՝ Քաղցկեղի դեմ պայքարի միջազգային օրվա առիթով հրավիրված ասուլիսում:
«2019-ը Հայաստանում ուռուցքաբանության համար շատ կարևոր տարի էր: 2019-ից չարորակ ուռուցքների վիրահատական բուժումը դարձավ անվճար: Տարվա կեսից ճառագայթային բուժումը ևս դարձավ անվճար: Դա լուծել է շատ կարևոր սոցիալական խնդիր: 2018-ին մեր կենտրոնում կատարվել է չարորակ ուռուցքով հիվանդների 1850 վիրահատություն, իսկ 2019-ին՝ 2562: Այսինքն՝ մոտ 32 տոկոսով ավելացել է քանակը»,-ասաց Մանուկյանը:
Նա նշեց՝ այդ մարդիկ նոր հիվանդներ չեն, պարզապես նախկինում ֆինանսական խնդրի պատճառով չեն վիրահատվել: Ներկայում քիմիաթերապիայի համար ծառայության մատուցումը կատարվում է անվճար, իսկ դեղորայքը տրամադրվում է՝ համավճարի սկզբունքով: Այդ ծառայությունը մեկ այլ հիվանդանոցում արժե մոտ 80 հազար դրամ: Հաշմանդամության կարգ չունեցող անձին մեկ կուրսի ընթացքում դեղի համար տրամադրվում է 30 հազար դրամ, իսկ կարգ ունեցողին՝ 60 հազար դրամ: Բայց դրանք ենթակա են փոփոխման:
2018-ին Հայաստանում գրանցվել է չարորակ նորագոյացությունների 8441 դեպք: Վերջին երեսուն տարվա ընթացքում հիվանդացությունն աճել է 1.6 անգամ: Վիճակագրական տվյալների վերլուծությունը փաստում է, որ տղամարդկանց շրջանում առավել տարածված են շնչափողի, բրոնխների, թոքի, ստամոքսի, լյարդի, ներլյարդային լեղուղիների և շագանակագեղձի, իսկ կանանց շրջանում՝ կրծքագեղձի, շնչափողի, բրոնխների, թոքի, հաստ աղու, ստամոքսի չարորական նորագոյացությունները:
ՀՀ առողջապահության նախարարության ուռուցքաբանության գծով խորհրդատու Հայկուհի Գյոկչյանը նշեց՝ թոքի քաղցկեղը 67 տոկոս դեպքերում հայտնաբերում են բարձիթողի վիճակում, այսինքն՝ ուշ փուլում: Թոքի քաղցկեղի 5 տարվա ապրելիությունը Հայաստանում 9 տոկոս է, ամբողջ աշխարհում 19-21 տոկոս է: Նա կոչ արեց հետազոտվել, վաղ փուլում հայտնաբերել, կանխարգելել:
«Շվեդիայի, Դանիայի պես զարգացած երկրներում թոքի, կրծքագեղձի քաղցկեղով հիվանդացությունը գտնվում է առաջին տեղում: Հայաստանը հիվանդացության առումով առաջին տեղում չէ, Հայաստանն առաջին տեղերում է մահացության առումով: Այդ երկրներում առաջին երկու փուլերում են հայտնաբերում քաղցկեղը։ Հայաստանում քանի որ թոքի, կոլորեկտալ քաղցկեղները հայտնաբերում են 56-65 տոկոս դեպքերում 4-րդ փուլում, բնականաբար, 5 տարվա ապրելիության ցուցանիշները ցածր են»,-ասաց Գյոկչյանը:
2018-ին Հայաստանում եղել է թոքի քաղցկեղով հիվանդացության 1138 նոր դեպք, կրծքագեղձի քաղցկեղով հիվանդացության 1086 դեպք: Հայաստանում առաջիկայում կգործարկվի քաղցկեղի ռեգիստր, որը թույլ կտա հիվանդացության, մահացության, բուժելիության հստակ վիճակագրություն ունենալ:
