ԱԻՆ-ը մտադիր է ուղղաթիռներ ձեռք բերել
ԱԻՆ-ը նպատակ ունի կառավարության միջոցով ուղղաթիռներ ձեռք բերել՝ բարձր լեռնային տարածքում հրշեջ-փրկարարական աշխատանքներ իրականացնելու համար, քանի որ Խոսրովի արգելոցի հրդեհի օրերին փրկարարները ձեռքով էին աշխատում: Այս մասին այսօր հրավիրված ասուլիսում հայտարարեց ԱԻ նախարար Ֆելիքս Ցոլակյանը՝ տեղեկացնելով, որ խոսքը մոտավորապես 4 ուղղաթիռի մասին է:
«Ուղղաթիռները բայց միայն դրա համար պետք չեն, մյուս կողմից՝ գերագնահատված է ուղղաթիռների դերը, որ իբր անտառային հրդեհների ժամանակ կարող են շատ ուժեղ աշխատել: Ոչ, այդքան էլ այդպես չէ: Ամենաուժեղ ձևը ՀՀ-ում, դա մարդկային գործոնն է»,- շեշտեց նա:
Այս համատեքստում Ֆելիքս Ցոլակյանը խոստացավ՝ «անջիգյար հրշեջներն ԱԻՆ-ում տեղ չունեն», և բոլոր նրանք, որոնք արատավորում են հրշեջների բարի համբավը, կհեռացվեն աշխատանքից։ Առաջիկայում սպասվում են կառուցվածքային փոփոխություններ, ինչպես նաև՝ օպտիմալացում։
Մարիամ Պետրոսյան
