Մադրիդը կվիճարկի բանտարկված քաղգործիչների համաներման մասին Կատալոնիայի խորհրդարանի նոր բանաձևերը
Իսպանիայի կառավարությունը կբողոքարկի Կատալոնիայի խորհրդարանի հավանությանն արժանացած բանաձեւերի նախագծերը, որոնք կապված են բանտարկված տարածաշրջանային քաղաքական գործիչների համաներման եւ ինքնավարությունից քաղաքացիական գվարդիայի դուրսբերման պահանջների հետ: Այդ մասին հայտնել են երկրի նախարարների կաբինետում:
Սեպտեմբերի 26-ին Կատալոնիայի պալատն «ինստիտուցիոնալ պատասխան» է խոստացել անջատական շարժման առաջնորդների նկատմամբ երկրի Գերագույն դատարանի «վճռին»: Ինքնավար մարզի խորհրդարանը նաեւ կաշխատի քաղաքական գործիչների համար համաներման հասնել ազատազրկման դատավճիռների դեպքում: Բացի դրանից, անկախության կողմնակիցները հանդես են եկել հօգուտ այն բանի, որ Իսպանիայի քաղաքացիական գվարդիայի աշխատակիցները հեռանան Կատալոնիայի տարածքից:
«Մենք ցանկանում ենք հայտնել, որ (Իսպանիայի) կառավարությունն ուսումնասիրում է (հավանության արժանացած նախաձեռնությունների) բովանդակությունը՝ դրանք բողոքարկելու եւ վերոհիշյալ բանաձեւերի դեմ դատական կարգով գործելու համար»,- ճշտել են նախարարների կաբինետում:
«Անհրաժեշտ է հաշվի առնել, որ դրանք դեռեւս պաշտոնապես հրապարակված չեն»,- հավելել են երկրի իշխանությունները: Տարածաշրջանային պալատի քայլը ձեռնարկվել է այն բանից հետո, երբ սեպտեմբերի 23-ին ձերբակալվել են Կատալոնիայի անկախության ինն արմատապես տրամադրված կողմնակիցներ: Կասկածյալներն այսպես կոչված հանրապետության պաշտպանության կոմիտեների անդամներ են, կոմիտեներ, որոնք պայքարում են Իսպանիայի կազմից ինքնավարության դուրս գալու օգտին: Խուզարկությունների ընթացքում նրանցից առգրավել են պայթուցիկ սարքերի պատրաստման նյութեր: Իրավապահ մարմինների աշխատակիցները համոզված են, որ կասկածյալները կարող էին մոտ ժամանակներս փորձել գրոհներ կազմակերպել, հաղորդել է ՏԱՍՍ-ը:
