Կատարի ԱԳՆ նախարարն Արաղչիի հետ զրույցում շեշտել է ԱՄՆ-Իրան համաձայնագրի կյանքի կոչման անհրաժեշտությունը
Կատարի վարչապետ, արտաքին գործերի նախարար շեյխ Մուհամմադ բին Աբդ ալ-Ռահման բին Ջասիմ ալ-Թանին հեռախոսազրույց է ունեցել Իրանի արտաքին գործերի նախարար Աբբաս Արաղչիի հետ, որի ընթացքում դատապարտել է Հորմուզի նեղուցում առևտրային նավերի վրա հարձակումները։ Այս մասին հայտնում է Al Jazeera-ն։
Կատարի արտաքին գործերի նախարարության հաղորդագրության մեջ նշվել է, որ կողմերը «քննարկել են նախորդ երկու օրերի ընթացքում Ամերիկայի Միացյալ Նահանգների և Իրանի Իսլամական Հանրապետության միջև ռազմական էսկալացիայի վերաբերյալ վերջին զարգացումները»։
Կատարի վարչապետն «ընդգծել է, որ նման գործողությունները խաթարում են վստահությունը, սպառնում են միջազգային նավագնացության անվտանգությանը և վնասում տարածաշրջանային անվտանգության և կայունության ամրապնդմանն ուղղված ջանքերին»։
Նա նաև «շեշտել է բոլոր կողմերի համար երկխոսության և դիվանագիտության, ինչպես նաև ԱՄՆ-Իրան ժամանակավոր համաձայնագրի շրջանակներում համաձայնեցվածի իրականացման անհրաժեշտությունը»։
Նա «վերահաստատել է Կատարի Պետության աջակցությունն էսկալացիայի զսպմանն ու համապարփակ համաձայնագրի հասնելուն ուղղված բոլոր ջանքերին, որոնք կնպաստեն անվտանգության և կայունության ամրապնդմանը և տարածաշրջանում կայուն խաղաղության հաստատմանը»։
