Ինչո՞ւ են ոսկորները հեշտ կոտրվում․ ո՞ր վիտամինների պակասն է պատճառը
«Տարին ձնառատ է, հատկապես տարեցները պետք է զգույշ լինեն փողոց դուրս գալու դեպքում»,- ասում է «Արթմեդ» ԲԿ վնասվածքաբանության և օրթոպեդիայի ծառայության ղեկավար Ռաֆայել Ավետիսյանը։
Նրա փոխանցմամբ՝ տարեցների մոտ հաճախակի կոտրվածքներ առաջանում են ազդրի շրջանում։
«Սառույցին ընկնելու հետևանքով կարող են ընդհուպ մինչև գանգուղեղային վնասվածքներ առաջանալ։ Տարեցների դեպքում ազդրի կոտրվածքներն են, քանի որ կա տարիների ընթացքում առաջացող սնուցման խանգարման խնդիր»,- նշեց վնասվածքաբանը։
Խոսելով փափուկ հյուսվածքների վնասվածքի՝ սալջարդի մասին, բժիշկը նշեց, որ այս դեպքում պետք է վնասված հատվածում սառույց դնել, ֆիքսել վնասված հատվածը և տեղափոխել հիվանդանոց։
Ինչ վերաբերում է կալցիումի, մագնեզիումի և վիտամին D-ի պակասի հետևանքով ոսկրի շուտ կոտրվեելուն՝ վնասվածքաբանն ընդգծեց.
«Միանշանակ։ Դրանք կարևոր են ոսկրի խտության և ամրության համար և դրանց քանակի նվազման դեպքում ոսկորը դառնում են փխրուն և վնասվածքի դեպքում հեշտ կոտրվում են»։
Ռաֆայել Ավետիսյանն ընդգծեց՝ կան նաև շատ հիվանդություններ, որոնք ազդում են ոսկրի վրա՝ հանգեցնելով փխրունության առաջացմանը՝ սկսած ռևմատոիդ արթրիտից, վերջացրած ուռուցքային հիվանդություններով։
