ԱՄՆ-ն կշարունակի «տնտեսապես խեղդել» Իրանին. Ռուբիո
Ամերիկյան ուժերը կշարունակեն թիրախավորել իրանական նավթատարները՝ ի պատասխան ամերիկյան ռազմանավերի վրա իրանական հարձակումների, հայտարարել է ԱՄՆ պետքարտուղարը: Մարկո Ռուբիոն ասել է, որ Վաշինգտոնը նպատակ ունի տնտեսապես «խեղդել» Թեհրանին։
«Ի վերջո, նրանք շարունակում են կրակել մեր ռազմածովային նավերի վրա, և երբ նրանք կրակում են մեր ռազմանավերի վրա, նրանք գին են վճարում տանկերներին մեր հարվածների տեսքով: Նրանք շատ տանկերներ են կորցնում»,- լրագրողներին ասել է Ռուբիոն։
«Նրանք կշարունակեն գին վճարել դրա համար, մինչդեռ մենք կշարունակենք տնտեսապես խեղդել նրանց»,- հավելել է նա։
Մինչ այդ էլ ԱՄՆ նախագահ Դոնալդ Թրամփը հայտարարել էր, որ Իրանի հետ վեց ամսից ավելի տևած պատերազմը կավարտվի նոյեմբերին անցկացվելիք ԱՄՆ Կոնգրեսի միջանկյալ ընտրություններից «անմիջապես» հետո:
«Կարծում եմ՝ պատերազմը կավարտվի ընտրություններից անմիջապես հետո», քանի որ Իրանն այլևս չի կարող դիմանալ»,- Սպիտակ տանը լրագրողներին ասել է Դոնալդ Թրամփը՝ հավելելով, թե Թեհրանն այս ընտրությունների վրա «ազդելու հուսահատ փորձեր» է անում:
Հունիսին Թեհրանը և Վաշինգտոնը փոխըմբռնման հուշագիր ստորագրեցին՝ ուղղված ռազմական գործողությունների դադարեցմանը, սակայն շաբաթներ անց կողմերը խախտեցին համաձայնագիրը: ԱՄՆ-ն շարունակում է Իրանի ծովային շրջափակումը՝ ի թիվս անցած ամիս հայտարարված տնտեսական խիստ պատժամիջոցների: Վերջին շաբաթներին կողմերը կրկին սկսել են պարբերաբար հարվածներ հասցնել միմյանց:
