Փոխադարձ առևտուրը 1 տարում աճել է 36%-ով. ՀՀ-ն և Իրաքը փոխըմբռնման 3 հուշագիր ստորագրեցին
Միայն 2025 թվականի առաջին կիսամյակում ՀՀ-ի և Իրաքի միջև առևտրաշրջանառությունը գերազանցել է 171 միլիոն դոլարը, ինչը գրեթե կրկնապատկվել է նախորդ տարվա նույն ժամանակահատվածի համեմատ։ Երևանում մեկնարկած Հայաստան-Իրաք տնտեսական համագործակցության միջկառավարական համատեղ հանձնաժողովի 4-րդ նիստի ժամանակայս մասին ասաց ՀՀ էկոնոմիկայի նախարար Գևորգ Պապոյանը։ Նա նման համաժողովները համարում է տնտեսական և քաղաքական կապերի զարգացման ու ամրապնդման անկյունաքարերից մեկը։
«2024 թվականին տարեկան կտրվածքով առևտրաշրջանառությունը կազմել է ավելի քան 246 միլիոն դոլար՝ 36 տոկոս աճ 2023-ի համեմատ»,– ընդգծեց նախարարը։
Նախարարի խոսքով՝ երկու երկրների միջև առևտրի ծավալներն աճում են կայուն տեմպերով, սակայն, ըստ նրա, դեռևս չօգտագործված ներուժ կա։ Ըստ Պապոյանի՝ Հայաստանի կառավարությունը հատուկ ուշադրություն է դարձնում ներդրումային միջավայրի բարելավմանը և մասնավոր հատվածի ներգրավվածությանը։
«Համոզված ենք, որ գործարար հանձնաժողովները և գործարար պատվիրակությունների փոխայցելությունները մեր գործարարներին հնարավորություն կտան հանդիպել, ծանոթանալ և սկսել նոր ծրագրեր»,– շարունակեց Գևորգ Պապոյանը։
Նա նշեց, որ հայկական կողմը հետաքրքրված է Իրաքի վերակառուցման գործընթացին մասնակցությամբ։ Նախարարը վստահեցրեց, որ Հայաստանի ձեռնարկությունները պատրաստ են ներդրումներ կատարել շինարարության, ենթակառուցվածքների, առողջապահության և գյուղատնտեսության ոլորտներում։
«Հայաստանի կառավարությունը մեծ նշանակություն է տալիս թվային տնտեսության զարգացմանը և նորարարական լուծումների ներդրմանը։ Մենք պատրաստ ենք փորձի փոխանակման և համատեղ նախագծերի իրականացման»,– շեշտեց նախարարը։
Բացի տնտեսական ոլորտից, Պապոյանը կարևորեց նաև մշակութային ու մարդասիրական հարաբերությունների խորացումը։ Նրա խոսքով՝ Հայաստանը պատրաստ է կազմակերպել փոխադարձ մշակութային օրեր, ցուցահանդեսներ և փառատոներ, խթանել կրթական ու ուսանողական փոխանակումները, իրականացնել երիտասարդական ու սոցիալական ծրագրեր։
Իրաքի Հանրապետության գյուղատնտեսության նախարար Աբբաս Ջաբր ալ-Մալիքին, համաձայնելով գործընկերոջ հետ, վերահաստատեց, որ Իրաքը պատրաստ է ՀՀ-ի հետ խորացնել հարաբերությունները տնտեսական ոլորտում։
«Ներկայիս Իրաքը որդեգրել է հավակնոտ և կայուն քաղաքականություն՝ տարածաշրջանային երկրների հետ համագործակցությունը խորացնելու և ընդլայնելու առումով։ Մենք ակնկալում ենք, որ հայկական ընկերությունները կներգրավվեն իրաքյան նախագծերում, այդ հնարավորությունն արդեն իսկ կա։ Դա վերաբերում է ծառայությունների, գյուղատնտեսության և առևտրի ոլորտներին», – նշեց ալ-Մալիքին։
Նա առաջարկեց ստեղծել կոմիտե՝ Իրաքի և Հայաստանի ձեռնարկատերերի մասնակցությամբ, ինչը թույլ կտա ավելի խթանել բիզնես կապերը երկու երկրների միջև։
Հայաստան-Իրաք տնտեսական համագործակցության միջկառավարական համատեղ հանձնաժողովի 4-րդ նիստի արդյունքներով ստորագրվեցին փոխըմբռնման հուշագրեր՝ առևտրաարդյունաբերական պալատների, Հայաստանի արդյունաբերողների և գործարարների միության ու Իրաքի առևտրաարդյունաբերական պալատի, ինչպես նաև Հայաստանի շինարարների ասոցիացիայի և Իրաքի կապալառուների ֆեդերացիայի միջև։
