Ռոմանոս Պետրոսյանը փորձում է ազատվել ՀԷՑ-ի կադրերից, աշխատանքից ազատվածներն էլ հերթով դատարան են դիմում
Ռոմանոս Պետրոսյանի՝ «Հայաստանի Էլեկտրական ցանցեր» ՓԲԸ-ում ժամանակավոր կառավարիչ նշանակվելուց հետո կառույցում կադրային ջարդ է սկսվել։ Ռոմանոս Պետրոսյանն աշխատանքից ազատում է կառույցի աշխատակիցներին՝ լուծելով նրանց հետ աշխատանքային պայմանագրերը։ Թե ինչ պատճառաբանություն առաջ քաշելով են ազատվում հին աշխատակիցներից՝ պարզ չէ, սակայն փաստ է, որ կառույցի արդեն նախկին աշխատակիցները, մեղմ ասած, համաձայն չեն այդ որոշման հետ և հերթով դատարան են դիմում՝ փորձելով վերականգնել իրենց իրավունքները։
«Փաստինֆո»-ն տեղեկացել է, որ միայն երեկ դատարան է ներկայացվել երեք հայցադիմում, որոնցով նախկին աշխատակիցները վիճարկել են Ռոմանոս Պետրոսյանի հրամանները՝ աշխատանքից իրենց ազատելու վերաբերյալ։
Մասնավորապես, Գագիկ Սարգսյանը հայցադիմումով պահանջում է անվավեր ճանաչել Ռոմանոս Պետրոսյանի՝ հուլիսի 31-ի հրամանը՝ իր հետ աշխատանքային պայմանագիրը լուծելու և վերջնահաշվարկ կատարելու վերաբերյալ, ինչպես նաև՝ ընկերությունից հօգուտ իրեն բռնագանձել հարկադիր պարապուրդի ամբողջ ժամանակահատվածի համար միջին աշխատավարձ։
Այս հայցադիմումը մակագրվել է Երևանի քաղաքացիական դատարանի դատավոր Սյուզաննա Ուլիխանյանին։ Համանման պահանջով հայցեր են ներկայացրել նաև Հովիկ Համբարձումյանը և Համբարձում Գրիգորյանը։
Վերջինիս հայցը մակագրվել է դատավոր Գոհար Գրիգորյանին, իսկ Համբարձումյանի հայցը՝ Տաթևիկ Ստեփանյանին։ Հայցադիմումները դեռևս վարույթ չեն ընդունվել։
Ավելի վաղ հայցադիմումներ է ներկայացրել նաև «Հայաստանի Էլեկտրական ցանցեր» ՓԲԸ-ի գործադիր տնօրենի նախկին տեղակալ, տնօրենի ԺՊ Դավիթ Ղազինյանը։
Հայցերից մեկով Ղազինյանը պահանջել է անվավեր ճանաչել իրեն աշխատանքից ազատելու մասին Ռոմանոս Պետրոսյանի հրամանը և վերականգնել պաշտոնում, երկրորդ հայցով պահանջել է ՀԷՑ-ին պարտավորեցնել 2025թ․ հուլիսի 14-ի ՀԷՑ կանոնադրության մեջ կատարված փոփոխությունները պետական գրանցման ներկայացնել, իրեն վերականգնել տնօրենի ժամանակավոր պաշտոնակատարի պաշտոնում, ինչպես նաև ՀԷՑ գործադիր մարմնի ղեկավարի ժամանակավոր պաշտոնակատարի պարտականությունները կատարող անձի և ժամանակավոր կառավարչի միջև լիազորությունների սահմանները որոշել։
Ավելի մանրամասն՝ սկզբնաղբյուր կայքում։
