Կովկասում պլաստիկը հզոր վառելիքի վերածելու միջոց են հայտնաբերել

Կաբարդինո-Բալկարիայի պետական համալսարանի (КБГУ) գիտնականները հետազոտական խմբի շրջանակներում մշակել են պլաստիկի վերամշակման մեթոդ, որը թույլ է տալիս այն վերածել պինդ վառելիքի՝ առանց վնասակար արտանետումների: Արդյունքները հրապարակվել են «Вестник КНИИ РАН. Серия «Естественные и технические науки»» ամսագրում:

Պլաստիկ թափոնների վերամշակման ավանդական մեթոդները, ինչպիսիք են այրումը, հանգեցնում են ածխածնի մոնօքսիդի, ազոտի օքսիդների և այլ վտանգավոր միացությունների արտանետման: Սա տեղի է ունենում օդում թթվածնի պակասի արդյունքում պոլիմերների ոչ լիարժեք այրման պատճառով, հայտնել են Կաբարդինո-Բալկարիայի պետական համալսարանի (КБГУ) հետազոտողները:

Համալսարանի մասնագետները առաջարկել են այս խնդրին լուծում՝ հիմնված մանրացված պլաստիկը փակ համակարգում այրելու վրա: Գործընթացն իրականացվում է նիտրատ-ալկալային օքսիդացնող հալվածքների (հալված աղեր, որոնք քայքայում են պլաստիկը առանց վնասակար արտանետումների) միջոցով: Նոր բացահայտված մեթոդը թույլ է տալիս ոչ միայն անվտանգ կերպով վերացնել պլաստիկը, այլև օգտագործել գործընթացում անջատված հսկայական էներգիան: Գիտնականների կարծիքով, պոլիմերի և հալույթի խառնուրդը կարող է ծառայել որպես հզոր պինդ վառելիք:

«Մեր մոտեցումը ոչ միայն լուծում է շրջակա միջավայրի խնդիրը, այլև վտանգավոր թափոնները վերածում է արժեքավոր էներգետիկ ռեսուրսի, որը կարող է օգտագործվել որպես վառելիք»,- РИА Новости-ի փոխանցմամբ՝ ասել է КБГУ-ի մաթեմատիկայի և բնական գիտությունների ինստիտուտի անօրգանական և ֆիզիկական քիմիայի ամբիոնի պրոֆեսոր Ժամալ Կոչկարովը։