Պակիստանը ողջունում է Ադրբեջանի և Հայաստանի միջև խաղաղության համաձայնագիրը. վարչապետ
Պակիստանի վարչապետ Մուհամմադ Շահբազ Շարիֆը ողջունել է Սպիտակ տանը ԱՄՆ նախագահ Դոնալդ Թրամփի մասնակցությամբ Ադրբեջանի Հանրապետության և Հայաստանի Հանրապետության միջև ստորագրված պատմական խաղաղության համաձայնագիրը: Նա դրա մասին նշել է X սոցիալական ցանցում արված գրառման մեջ:
«Այս կարևոր իրադարձությունը նշանավորում է խաղաղության, կայունության և համագործակցության դարաշրջանի սկիզբը Հարավային Կովկասի տարածաշրջանում, որը տասնամյակներ շարունակ վերապրել է մարդկային տառապանքներ պատճառած հակամարտություններ: Շնորհավորում ենք Ադրբեջանի նախագահ Իլհամ Ալիևին և Ադրբեջանի ժողովրդին այս պատմական համաձայնագրի կապակցությամբ, որը ձևավորում է տարածաշրջանի խաղաղ ապագան՝ հիմնվելով իմաստության, հեռատեսության և հավասարակշռված որոշումների վրա»,- ընդգծել է նա:
Պակիստանի վարչապետը նաև բարձր է գնահատել ԱՄՆ նախագահ Դոնալդ Թրամփի միջնորդական դերը, որի ղեկավարությամբ հնարավոր եղավ կողմերին բերել բանակցությունների սեղանի շուրջ և հասնել համաձայնության, որը նոր հնարավորություններ կբացի առևտրի, կապի և տարածաշրջանային ինտեգրման համար:
«Հուսով ենք, որ երկխոսության այս ոգին օրինակ կդառնա երկարատև հակամարտությունների առջև կանգնած այլ տարածաշրջանների համար»,- հավելել է նա:
Հիշեցնենք, որ Հայաստանի և Պակիստանի միջև դիվանագիտական հարաբերություններ չկան։ Պակիստանն այն քիչ երկրներից է, որը չի ճանաչել Հայաստանի Հանրապետության ինքնիշանությունը, անկախությունն ու տարածքային ամբողջականությունը:
